TV

Vendimi i opozitës bullgare për të mbështetur heqjen e vetos ndaj Maqedonisë së Veriut ka nxitur shpresat për zhbllokimin e mundshëm të nisjes zyrtare të bisedimeve për anëtarësim në Bashkimin Europian mes Brukselit dhe Tiranës e Shkupit. Por vendimi i Sofjes duket se do të varet nga mocioni i mosbesimit ndaj qeverisë që do të votohet sonte në parlament. Marrëveshja mes Prishtinës dhe Beogradit mbi energjinë, për veriun e Kosovës ngjall debate të ashpra në parlamentin e Kosovës. Opozita akuzon kryeministrin Kurti për standarde të dyfishta në qasjen ndaj marrëveshjeve të arritura në bisedimet me Serbinë, të cilat i kishte kundërshtuar me forcë kur ishte në opozitë. Në Shqipëri, ekspertët pohojnë se transparenca e financimit të partive politike, një nga çështjet më problematike në Shqipëri, duhet të bëhet përmes një ligji detyrues dhe jo vetëdeklarimeve.