TV

Ukraina hedh poshtë ultimatumin për të dorëzuar Mariupolin, një qytet i rëndësishëm strategjik që do të lidhte forcat ruse në jug me ato në lindje të Ukrainës. Mariupoli ka tre javë që bombardohet në atë që zyrtarët perëndimorë e kanë quajtur krim masiv lufte. Aleanca e NATO-s zhvillon këtë javë një takim urgjent ku merr pjesë edhe presidenti Biden. Aleanca po përpiqet të forcojë krahun e saj lindor, e përballur me atë që zyrtarët, diplomatët, dhe autoritetet e zbulimit e sigurisë, bien dakord që është kërcënimi më serioz për sigurinë kolektive të aleancës, që nga Lufta e Ftohtë. Komisioni Evropian paralajmëroi sot për rrezikun e trafikimit të fëmijëve ukrainas, ndërsa mbi 3.3 milionë njerëz janë larguar nga vendi që kur filloi agresioni i Rusisë.