Banka “JPMorgan Chase” ra dakord të martën të paguajë 75 milionë dollarë për territorin amerikan “Virgin Islands” për të zgjidhur paditë se banka kishte mundësuar aktet e trafikimit seksual nga financieri Jeffrey Epstein.
Banka JPMorgan tha se 55 milionë dollarë nga pagesa do të shkojnë për bamirësitë lokale që ofrojnë ndihmë për viktimat e abuzimit në familje, trafikimit dhe krimeve të tjera, si dhe për të rritur aftësitë e zbatimit të ligjit në atë vend.
Nga kjo shumë, 10 milionë dollarë do të përdoren për të krijuar një fond për të ofruar shërbime të shëndetit mendor për të mbijetuarat e skandalit Epstein, sipas Departamentit të Drejtësisë të Ishujve të Virgjër (Virgin Islands).
Territori amerikan, Virgin Island, ku financieri Epstein kishte një pronë, ngriti padi vitin e kaluar kundër bankës JPMorgan, duke thënë se hetimi i saj kishte zbuluar se gjigandi i shërbimeve financiare u mundësoi rekrutuesve të financierit Epstein që të paguanin viktimat dhe roli i saj ishte "i domosdoshëm për funksionimin dhe fshehjen e aktiviteteve të trafikimit të Epstein-it".
Departamenti i Drejtësisë i Ishujve të Virgjër (Virgin Islands) kishte kërkuar dënime dhe një gjobë prej të paktën 190 milionë dollarë.
Në fakt, hetuesit kishin argumentuar se JPMorgan kishte vepruar si bashkëpunëtor në veprimet e financierit Epstein dhe nuk i njoftoi organet e rendit ose rregullatorët e bankave për faktin se financieri Epstein ishte një klient "me rrezikshmëri të lartë" dhe që tërhiqte në mënyrë të përsëritur shuma të mëdha parashë nga banka.
Marrëveshja shmang një gjyq që ishte caktuar të fillonte muajin e ardhshëm.
Banka tha gjithashtu se arriti një marrëveshje konfidenciale ligjore me zotin James "Jes" Staley, ish-ekzekutivin kryesor të JPMorgan i cili menaxhoi llogarinë e financierit Epstein përpara se të largohej nga banka.
Banka JPMorgan ngriti padi kundër zotit Staley në fillim të këtij viti, me pretendimet se ai fshehu ose minimizoi keqbërjet e financierit Epstein për të ruajtur llogarinë fitimprurëse.
JPMorgan ra dakord në qershor që të paguante 290 milionë dollarë lidhur me një padi kolektive që përfshinte viktima të krimeve të trafikimit të financierit Epstein, i cili u vetvra në një burg federal në vitin 2019.
