Një gjykatës në shtetin e Xhorxhias vendosi të enjten se ish Presidenti Donald Trump dhe 16 të tjerë, do të gjykohen veçmas nga dy të pandehurit, që do të dalin në gjyq muajin e ardhshëm lidhur me akuzat për pjesëmarrje në një skemë të paligjshme për të përmbysur rezultatin e zgjedhjeve të vitit 2020.
Avokatët Sidney Powell dhe Kenneth Chesebro kishin paraqitur kërkesa për një gjyq të shpejtë dhe gjykatësi i Gjykatës së Lartë të Qarkut të Fultonit, Scott McAfee vendosi që gjyqi i tyre të fillonte më 23 tetor.
Ish Presidenti Trump dhe të pandehuri e tjerë kishin kërkuar që të gjykoheshin veçmas nga avokatët Powell dhe Chesebro, pasi disa prej tyre thanë se nuk mund të jenë gati për gjykim në fund të tetorit.
Prokurorja e Qarkut të Fultonit, Fani Willis, muajin e kaluar ngriti një aktpadi kundër zotit Trump dhe 18 personave të tjerë, që përfshin akuza për shantazh dhe trysni ndaj zyrtarëve shtetërorë për të përmbysur rezultatin e zgjedhjeve presidenciale të vitit 2020, të cilat i fitoi demokrati Joe Biden.
Prokurorja Willis kishte kërkuar që 19 të pandehurit të gjykoheshin së bashku, duke argumentuar se kjo do të ishte më efikase dhe më e drejtë. Gjykatësi McAfee përmendi mes tjerash edhe orarin e ngjeshur të gjykatës si një faktor në vendimin e tij për të ndarë rastin e avokatëve Powell dhe Chesebro, nga ai ndaj ish Presidentit Trump dhe 16 të pandehurve të tjerë.
“Aftësia e Gjykatës për të mbrojtur të drejtën për një proces të rregullt ligjor të çdo të pandehuri dhe për përgatitjen e tyre të duhur për gjyqin në rrugën aktuale të përshpejtuar është faktor i rëndësishëm, ndoshta vendimtar, në favor të ndarjes së procesit gjyqësor”, theksoi gjykatësi McAfee. Ai shtoi se mund të jetë e nevojshme, që çështja të ndahet më tej në grupe më të vogla për gjykim.
Ky zhvillim ka të ngjarë të jetë një lajm i mirëpritur për të pandehurit e tjerë, që duan të distancohen nga avokatja Powell, e cila ndoshta më shumë se kushdo tjetër në kampin e zotit Trump, ishte e zëshme për nxitjen publike të teorive të pabaza të konspiracionit, që lidhnin qeveritë e huaja me ndërhyrjet në zgjedhje.
Një tjetër i pandehur në rastin e Atlantës, ish-kryebashkiaku i qytetit të Nju Jorkut, Rudy Giuliani, ka kërkuar të distancohet nga avokatja Powell dhe ka folur gjatë për të në një intervistë me ekipin e prokurorit të posaçëm Jack Smith në Uashington, sipas një personi me njohuri nga rrëfimin e tij, i cili foli në kushte anonimiteti.
Avokatët Chesebro dhe Powell kishin kërkuar të gjykoheshin veçmas nga njëri-tjetri, por gjykatësi e refuzoi kërkesën e tyre.
Duke shpjeguar më tej vendimin e tij për të ndarë të tjerët nga avokatët Powell dhe Chesebro, gjykatësi McAfee tha se ishte skeptik ndaj argumentit të prokurorëve se gjykimi i të 19 të pandehurve së bashku do të ishte më efikas. Ai vuri në dukje se gjykata e qarkut të Fultonit nuk ka një sallë gjyqi me vende të mjaftueshme për 19 të pandehur, avokatët e tyre dhe të tjerët, që do të duhej të ishin të pranishëm dhe se zhvendosja në një ndërtesë me sallë më të madhe, mund të ngrejë shqetësime për sigurinë.
Ish Presidenti Trump nuk do të gjykohet njëkohësisht me avokatët Powell dhe Cheseboro
