Anketimi: Shumica e votuesve thonë se demokracia amerikane është në rrezik
Gati tre të katërtat e votuesve në zgjedhjet presidenciale të së martës thonë se demokracia amerikane është nën kërcënim, sipas anketimeve paraprake në nivel kombëtar nga firma “Edison Research”, duke reflektuar ankthin e thellë me të cilin përballet vendi pas një fushate të nxehtë elektorale ndërmjet kandidates demokrate Kamala Harris dhe kandidatit republikan Donald Trump.
Demokracia dhe ekonomia renditen deri tani si çështjet më të rëndësishme për votuesit, me rreth një të tretën e të anketuarve që përmendin secilën, të ndjekur nga aborti dhe emigracioni me 14% dhe 11%, treguan të dhënat. Anketimi tregoi se 73% e votuesve besonin se demokracia ishte në rrezik, kundrejt vetëm 25% që thanë se ishte e sigurt.
Të dhënat nënvizojnë shkallën e polarizimit në një vend, ndasitë e të cilit vetëm u theksuan gjatë një gare të ashpër konkurruese.
Të paktën gjashtë gazetarëve iu mohua akreditimi nga ekipi elektoral i ish-Presidentit Donald Trump
Të paktën gjashtë gazetarëve iu mohua akreditimi i medias për të mbuluar aktivitetin për ndjekjen e rezultateve të zgjedhjeve të ekipit të ish-Presidentit Donald Trump në Florida për shkak të mbulimit të tyre në media të kandidatit presidencial republikan.
Zëri i Amerikës konfirmoi se gjashtë gazetarët punojnë për faqet mediatike Axios, Politico dhe Puck.
Në rastin e Politico-s, tre gazetarë dhe një fotograf ishin miratuar fillimisht për të marrë pjesë në aktivitet, por të martën zbuluan se kredencialet e tyre ishin mohuar.
Një person me dijeni për këtë çështje i tha Zërit të Amerikës se vendimi duket se ishte i lidhur me artikujt në revistën Politico për një nacionalist të bardhë, i cili kishte punuar në ekipin elektoral të zotit Trump në Pensilvani dhe që më vonë u pushua nga puna.
Të dhëna të mëtejshme nga anketimet pas votimit
Sipas të dhënave të anketimit të firmës Edison Research, të publikuara nga agjencia e lajmeve Reuters:
* 44% e votuesve në mbarë vendin thanë se kishin një pikëpamje të favorshme për zotin Trump, krahasuar me 46% që ishin shprehur kështu në anketimin e firmës Edison Research në vitin 2020. 54% e shohin atë në mënyrë të pafavorshme, krahasuar me 52% në 2020.
* 48% e votuesve në mbarë vendin thanë se kishin një pikëpamje të favorshme për zonjën Harris, krahasuar me 52% që thanë të njëjtën gjë për Presidentin Biden në anketimin e firmës Edison Research në vitin 2020. 50% e shohin atë në mënyrë jo të favorshme, krahasuar me 46% që e shihnin zotin Biden kështu në vitin 2020.
* 31% e votuesve në mbarë vendin thanë se ekonomia ishte më e rëndësishmja për të vendosur se si të votonin në zgjedhjet presidenciale. 11% përmendën emigracionin, 14% abortin, 34% gjendjen e demokracisë, 4% politikën e jashtme.
* 45% e votuesve në mbarë vendin thanë se gjendja financiare e familjes së tyre ishte më e keqe se sa ishte katër vjet më parë, krahasuar me 20% që thanë kështu në anketimin e firmës Edison Research në vitin 2020. 24% thanë se ishin më mirë se katër vite më parë, krahasuar me 41% në 2020. 31% thanë se gjendja e tyre financiare ishte e pandryshuar.
* 51% e votuesve në mbarë vendin thanë se i besojnë më shumë ish-Presidentit Trump për të menaxhuar ekonominë, ndërsa 47% thanë se i besojnë më shumë Nënpresidentes Harris.
Mbyllen qendrat e para të votimit
Vendvotimet e para që mbyllen janë në disa pjesë të Indianas dhe Kentakit, në orën 18:00. Vendet e votimit në pjesë të të dy shteteve që janë në zonën kohore qendrore, do të qëndrojnë të hapura deri në orën 19:00 të bregut lindor.
Në orën 20:00, të gjitha vendvotimet do të mbyllen në gjysmën e shteteve të vendit: Alabama, Connecticut, Delaware, Florida, Xhorxhia, Indiana, Illinois, Kentucky, Maine, Maryland, Massachusetts, Mississippi, Missouri, New Hampshire, New Jersey, North Carolina, Ohio, Oklahoma, Pensilvania, Rhode Island, Karolina e Jugut, Tenesi, Vermont, Virxhinia dhe Virxhinia Perëndimore.
Qendrat e votimit qëndrojnë të hapura më vonë në Alaskë, ku do të mbyllen në orën 1 të mëngjesit.
Që nga e marta, gjurmimi nga agjencia e lajmeve Associated Press i votimeve të hershme në mbarë vendin tregoi se mbi 82 milionë fletë votimi u hodhën përpara ditës së zgjedhjeve, që është pak më shumë se gjysma e numrit të përgjithshëm të votave në zgjedhjet presidenciale katër vite më parë.
Megjithatë, për rezultatet në shumë prej atyre shteteve do të duhen orë, nëse jo ditë, për t'u shpallur.
Zgjedhjet presidenciale pritet të përcaktohen nga rezultate në disa shtete të fushëbetejës elektorale.
Kërcënime të rreme për bomba iu bënë qendrave të votimit në tre prej shteteve të pavendosura – në Xhorxhia, Miçigan dhe Wisconsin, tha FBI-ja të martën. Sipas FBI-së, shumë prej kërcënimeve duket se e kanë origjinën nga adresa ruse të postës elektronike.
"Asnjë nga kërcënimet nuk është përcaktuar të jetë i besueshëm deri më tani", tha FBI-ja në një deklaratë, duke shtuar se integriteti i zgjedhjeve ishte ndër prioritetet më të larta të kësaj agjencie.
Të paktën dy qendra votimi të shënjestruara në Xhorxhia u evakuuan shkurtimisht të martën.
Sekretari republikan i shtetit të Xhorxhias, Brad Raffensperger fajësoi ndërhyrjen ruse.
“Duan të bëjnë keq, me sa duket. Nuk duan që ne të kemi zgjedhje të qeta, të ndershme dhe të sakta, dhe nëse mund të na bëjnë të luftojmë mes nesh, ata mund ta llogarisin këtë si një fitore", u tha zoti Raffensperger gazetarëve.