Suedia u bë sot zyrtarisht anëtare e NATO-s në Uashington, dy vjet pasi agresioni rus ndaj Ukrainës solli si rezultat rishikimin e politikave të sigurisë kombëtare nga ana e saj duke pasur parasysh garancitë e sigurisë që ofron Aleanca. Presidenti amerikan Joe Biden mban sot fjalimin e tij të përvitshëm për gjendjen e vendit, ku pritet të trajtojë menaxhimin e ekonomisë, të drejtat për riprodhimin, emigracionin, si dhe konfliktet në Ukrainë dhe në Gazë. Në Prishtinë, për disa orë me radhë, zyrtarë të Dhomave të Specializuara me seli në Hagë, bastisën shtëpinë e ish komandantit të Ushtrisë Çlirimtare të Kosovës, Sulejman Selimi.