Forcat paqeruajtëse të NATO-s në Kosovë thanë sot (e mërkurë) se kanë kryer një sërë stërvitjesh ushtarake gjatë këtyre ditëve në veriun e Kosovës, për të garantuar një mjedis të sigurt e liri të lëvizjes.
Stërvitjet u zhvilluan në një periudhë tensionesh të larta në veriun e Kosovës, ku për të dymbëdhjetën ditë me radhë grupe qytetarësh serbë po mbajnë të bllokuara rrugët që çojnë për në vendkalimet kufitare që lidhin Kosovën me Serbinë.
“Për shkak të mjedisit aktual operativ, është thelbësore që këto sisteme dhe aftësi të sprovohen, pasi ato zbusin rrezikun e përgjithshëm, nëse marrëveshjet e ardhshme politike nuk mund të arrihen”, thuhet në një njoftim të KFOR-it, në të cilin nënvizohet se ky mision, ka aftësitë e nevojshme për të siguruar kushtet që nxisin dialogun e mëtjeshëm politik ndërmjet Prishtinës dhe Beogradit, me ndërmjetësimin e Bashkimit Evropian.
KFOR-i tha se ka shtuar praninë në vendkalimin kufitar në Jarinjë duke pasur parasysh raportimet e fundit për praninë e mundshme të grupeve të organizuara kriminale që ishin përfshirë në protesta.
“Jemi të përgatitur të ndërhyjmë, në rast nevoje, por ne parandalojmë përshkallëzimin në përputhje me mandatin tonë nga Kombet e Bashkuara”, thuhet në njoftimin për media të KFOR-it.
Javën e kaluar Serbia kërkoi që rreth një mijë forca të saj të sigurisë të kthehen në Kosovë me gjithë paralajmërimet perëndimore se një kërkesë e tillë, nuk ka gjasë të pranohet dhe vetëm sa shton tensionet në zonë.
KFOR-i tha sot se po analizon këtë kërkesë të autoriteteve serbe, ndërsa ritheksoi se vazhdon të ofrojë mjedis të sigurt dhe liri të lëvizjes që inkurajon dialog të frytshëm, duke iu dhënë udhëheqësve mundësinë për të arritur zgjidhje afatgjata dhe të qëndrueshme, në të mirë të të gjitha komuniteteve që jetojnë në Kosovë”.
Organizatorët e bllokadave në veri thanë se të enjten në mesditë do të mbahet një protestë në një fshat të komunës së Zveçanit, për të kundërshtuar ato që i quajtën “kërcënimet e fundit” të kryeministrit të Kosovës Albin Kurti, i cili sipas tyre ka bërë thirrje “për vrasjen e serbëve në barrikada”.
Këto pohime i referohen një interviste të kryeministrit Kurti për gazetën britanike “The Guardian”, ku ai citohet të ketë thënë se brenga e autoriteteve të Kosovës është që largimi i barrikadave të vendosura nuk mund të përjashtojë viktimat, dhe se për këtë arsye “Kosova dëshiron të tregohet sa më kujdesshme për t’u siguruar se nuk do të ketë përshkallëzim të situatës”.
Kosova dhe Serbia akuzojnë njëra-tjetrën për situatën e krijuar në veriun e banuar me shumicë serbe, ndërsa diplomatët perëndimorë në vazhdimësi po u bëjnë thirrje palëve të ulin tensionet dhe t’u kthehen bisedimeve për normalizimin e marrëdhënieve ndërmjet tyre.