Kryeministrja britanike Liz Truss jep dorëheqjen, pas 45 ditësh në detyrë, për shkak të dështimit të programit të saj ekonomik, që shkaktoi reagime të forta në tregjet e aksioneve dhe përçarje brenda partisë konservatore. I dërguari amerikan për Ballkanin Perëndimor, Gabriel Escobar, tha sot në Beograd se pret që dialogu Kosovë-Serbi të vazhdojë në mënyrë dinamike e konstruktive. Një ditë më parë zoti Escobar tha se Shtetet e Bashkuara mbështesin propozimin franko-gjerman për një marrëveshje ndërmjet dy vendeve. Në Tiranë, sindikata e universiteteve protestoi sot për të katërtën ditë me bojkotim të procesit mësimor, duke kërkuar rritje të pagës si dhe të fondeve për kërkim shkencor. Por qeveria thotë se autonomia u krijon universiteteve hapësira për të rritur vetë pagat.