Sekretari amerikan i Mbrotjes Lloyd Austin deklaroi sot se Ukraina mund të fitojë luftën kundër Rusisë. Komentet ai i bëri gjatë një takimi Gjermani me zyrtarë të më shumë se 40 vendeve për të koordinuar më tej ndihmat e sigurisë për Ukrainën. Po sot Rusia akuzoi NATO-n për përfshirje në luftën e Ukrainës çka sipas saj, ka krijuar një rrezik serioz për luftë bërthamore. Në Kosovë gjashtë gra ukrainase po mësojnë se si të çaktivizojnë minat tokësore në vendin e tyre të shkatërruar nga lufta. Ato janë grupi i parë i çminuesve ukrainase që po stërviten në qytetin e Pejës. Intervitë me studiuesin Gëzim Alpion, profesor në departamentin e Sociologjisë në universitetin e Birmingamit në Britani. Ai do të mbajë ligjërata në dy universitete prestigjioze amerikane, në Universitetin Georgetown dhe atë të Harvardit, rreth studimeve të tij kushtuar humanistes dhe misionares me origjinë shqiptare Nënë Tereza.