I dërguari i Posaçëm i Shteteve të Bashkuara për Ballkanin Perëndimor, Gabriel Escobar, tha sot se marrëveshja për normalizimin e marrëdhënieve Kosovë – Serbi duhet të ketë në qendër njohjen e ndërsjellë dhe se bisedimet nuk kanë të bëjnë me statusin e saj. Në Shqipëri, Presidenti Ilir Meta dekretoi sot gjyqtaren Arbena Ahmeti si anëtare të Gjykatës së Lartë. Me këtë emërim, kjo gjykatë arrin kuorumin e nevojshëm për emërimin e 3 anëtareve të Gjykatës Kushtetuese. Sekretari i Përgjithshëm i NATO-s tha sot se nuk ka parë shenja tërheqjeje nga ana e Rusisë, por përkundrazi vazhdim të dislokimeve ushtarake nga ana e saj. Ndërkohë Bashkimi Evropian paralajmëroi mbi pasojat që do të kishte një agresion rus, jo vetëm ndaj Ukrainës, por mbarë Evropës.