Sekretari amerikan i Shtetit Antony Blinken mbërriti të premten në Liverpul, Angli, për të filluar takimet me ministrat e jashtëm për të diskutuar rreth Shoqatës së Vendeve të Azisë Juglindore (ASEAN). Ai do ta vazhdojë udhëtimin e tij deri më 17 dhjetor drejt Indonezisë, Malajzisë, Tajlandës dhe Hauait.
Kryediplomati amerikan do të takohet të premten me udhëheqësit e G-7ës, përfshirë Sekretaren e Jashtme britanike Liz Truss dhe Ministren e Jashtme gjermane Annalena Baerbock.
Udhëtimi i Sekretarit Blinken është pjesë e përpjekjeve të Shteteve të Bashkuara për të avancuar më tej "partneritetin strategjik" me ASEAN-in, ndërsa administrata e Presidentit Biden synon të fillojë në vitin 2022 një kuadër të ri ekonomik në rajonin Indo-Paqësor.
Presidenti Biden duke iu drejtuar samitit të ASEAN-it në tetor 2021
Për herë të parë, vendet anëtare të ASEAN-it janë ftuar të marrin pjesë në një takim dy ditor të ministrave të jashtëm dhe të zhvillimit të G-7ës që po zhvillohet në Liverpool. Në Grupin e Shtatëshes marrin pjesë vendet demokratike më të pasura të botës.
Në axhendën e Sekretarit Blinken janë parashikuar takime me disa nga homologët e tij nga Azia juglindore në kuadrin e punimeve të G-7ës, përpara se ai të niset drejt rajonit Azi-Paqësor javën e ardhshme.