Grupi militant Hamas që sundon Gazën, sot vendosi t’i japë fund mosmarrëveshjes politike dhe territoriale me Lëvizjen Fatah të presidentit palestinez Mahmoud Abbas, duke rënë dakord për shpërbërjen e trupit adminstrativ dhe mbajtjen e zgjedhjeve të përgjithshme.
Në kushtet kur ekonomia e Gazës është në gjendje të vështirë dhe energjia elektrike në enklavën në brigjet mesdhetare zgjat jo më shumë se 4 orë në ditë, grupi Hamas tha se do të lejojë menjëherë që vendi të udhëhiqet nga një qeveri uniteti, nën udhëheqjen e Mahmud Abasit.
Qeveria e përbashkët u formua tre vjet më parë, por deri më sot ka qenë e paaftë të qeverisë trojet palestineze.
Lajmi i sotëm vjen pas takimeve të veçanta gjatë ditëve të fundit në mes delegacioneve të Hamasit dhe Fatahut me zyrtarë të zbulimit egjiptian në Kairo.