Zëvendës presidenti i Kongresit Botëror Hebraik, Robert Singer, të martën në Prishtinë, vuri lule në pllakën përkujtimore kushtuar hebrenjve që pësuan gjatë Holokaustit nëpër kampet e përqendrimit në Gjermani dhe vende tjera të Evropës.
Pllaka përkujtimore në qendër të Prishtinës, është vendosur në vitin 2013 në vendin kur dikur ngrihej sinagoga e vetme në qytet dhe e cila ishte rrënuar në fillim të viteve të 60-ta të shekullit të kaluar, nga regjimi komunist i kohës.
Zoti Singer, u prit nga udhëheqësit e Kosovës të cilët ritheksuan miqësinë ndërmjet shqiptarëve dhe hebrenjve dhe përkujtuan veprimet e shqiptarëve që rrezikuan jetët e tyre në përpjekje për të shpëtuar hebrenjtë, që ndiqeshin kudo gjatë luftës së dytë botërore.
Presidenti i Kosovës, Hashim Thaçi, sipas një komunikate të lëshuar nga zyra e tij, ka theksuar se Kosova është mirënjohëse për ndihmën dhe përkrahjen që shteti i Izraelit u ka dhënë qytetarëve të Kosovës, sidomos në vitet 1998 dhe 1999.
“Miqësia jonë i ka rrënjët thellë në histori dhe në fatet e ngjashme që kemi pasur si popuj”, citohet të ketë thënë ai.
Komunikata citon zotin Singer të ketë theksuar se “populli hebre nuk e harron ndihmën e popullit shqiptar për popullin hebraik”, ndërsa ka vlerësuar lartë tolerancën fetare në Kosovë.
“E gjeni veten në një rajon të ndjeshëm dhe është i admirueshëm përcaktimi për paqe dhe harmoni mes feve”, u shpreh Singer.
“Toleranca dhe bashkëjetesa janë vlera tonat”, ka theksuar presidenti Thaçi, duke nënvizuar se Kosova është shtëpi e të gjithë komuniteteve të saj.
Kryeministri i Kosovës, Ramush Haradinaj, i cili së bashku me zotin Singer bënë homazhe te pllaka përkujtimore e hebrenjve, tha se “është vërtet ndjenjë e mirë që shqiptarët në ato rrethana, që kanë qenë jo të lehta, janë vënë në mbrojtje të hebrenjve. Si Kosovë na vjen mirë që bazuar në këto vlera i takojmë botës që ka respektuar jetën e njerëzve në kohërat më të vështira. Shqiptarët strehuan dhe mbrojtën hebrenjtë sepse ajo ishte gjëja e duhur për t’u bërë”.
After paying tribute to #HolocaustObelisk, had the honour to host #RobertSinger, CEO @WorldJewishCong. Tolerance, understanding & peace among cultures & communities are values that shall be preserved. #Kosovo resembles this model & its #Jewish comm. is an integral part of it. pic.twitter.com/cIAdRfPBWf
— Ramush Haradinaj (@haradinajramush) March 12, 2019
Në një njoftim të zyrës së tij thuhet se kryeministri Haradinaj, “e njoftoi zotin Singer për vendimin për ngritjen e Muzeut të Trashëgimisë Hebraike në Prizren, që do t’i shërbejë ruajtjes së kujtesës historike dhe miqësisë mes dy popujve”.