Organizata Ndërkombëtare e Migrimit dhe Instituti i Statistikave publikuan sot një studim për ri-integrimin e emigrantëve të kthyer në atdhe, sipas të cilit në 4 vitet e fundit janë kthyer në Shqipëri mbi 134 mijë persona, me një shpejtësi dy herë më të lartë se më parë.
Your browser doesn’t support HTML5
Studim për emigrantët e kthyer
Studimi zbuloi se 94 për qind e tyre janë kthime vullnetare, 70 për qind nga Greqia dhe dhe 25 për qind nga Italia.
Shkaku kryesor i kthimeve në vendlindje janë arësyet ekonomike, papunësia dhe kriza ekonomike që mbërtheu vendet fqinje, ndërsa mosha mesatare e të kthyerve është midis 30-38 vjeç.
Anketa zbuloi se mbi 60 për qind e emigrantëve të kthyer shqiptarë janë vendosur në banesat e mëparshme të familjes së tyre, ndërsa 40 për qind të tjerë po jetojnë në aksin Tiranë-Durrës dhe në Vlorë.
Studimi nxori se pas 4 vjet emigrimi në itali apo 7 vjet jetë në Greqi, emigrantët e papunë shqiptarë shumica me arsim të mesëm, u kthyen në Shqipëri dhe pjesa më e madhe u vetëpunësuan në bujqësi dhe në biznese të vogla.
Pjesa dërrmuese e emigrantëve ishin shumë të varfër para largimit, por u përmirësua ndjeshëm në emigracion. Shumica e tyre kanë dërguar në familjet e tyre në Shqipëri mesatarisht 200-250 euro në muaj, ndonëse kjo ka rënë për shkak të krizës.
Sipas studimit, pjesa më e madhe e të kthyerve nuk ka kryer investime në Shqipëri, ose sepse nuk kanë fonde të mjaftueshme, ose se nuk kanë siguri.
Studiuesit zbuluan nga anketat se rreth gjysma e të kthyerve së bashku me familjet do të qëndrojnë në Shqipëri përgjithmonë, ndërsa një e treta janë të përkohshëm dhe se mendojë të emigrojnë përsëri.
Shqipëria e vuajti mjaft gjatë tranzicionit largimin masiv të popullatës në vende të tjera për jetesë më të mirë. Varfëria e vendit të tyre i shtyu rreth 1 milionë banorë drejt emigracionit, ku ndeshën vështirësi të reja, që në vendin e tyre nuk i kishin. Tani sipas të dhënave të fundit, përvec dërgesave mujore të parave, një pjesë e madhe e tyre janë kthyer po aq të pafuqishëm për mirëqenie dhe investime tek bizneset e vogla sa u nisën. Vetëm 8 % e të kthyerve ka arritur të realizojë një projekt investimi. Pjesa tjetër, nuk kanë projekt investimi dhe as kapitale për investime të vogla dhe vetëpunësim.