Në Tiranë veprimtarët e mjedisit mbollën mbi 100 fidanë pishash në sheshin e ndërtimit, që bashkia ka rrethuar për të ngritur një kënd lojërash për fëmijë.
Your browser doesn’t support HTML5
Tiranë: Protestë e ambjentalistëve
Vullnetarët dyshojnë se aty po ngrihen konstruksione hekuri dhe betoni pas prerjes së disa dhjetëra pemëve.
Por bashkia e ka hedhur poshtë këto akuza.
Veprimtarët e mjedisit zhvilluan sot një protestë të veçantë kundër ndërtimeve të bashkisë në parkun e Liqenit Artificial, duke mbjellë mbi 100 fidanë pishash në rrugicat e mbushura me zhavorr të zonës së rrethuar të kantierit.
Një javë më parë ata rrëzuan atë rrethim në përpjekje për të penguar ndërtimin nga bashkia në atë park të një këndi lojërash për fëmijë, sipas tyre, mbi konstruksione hekuri dhe betoni.
Shumë prej tyre u arrestuan nga policia gjatë protestës së parë, kur ata kundërshtuan projektin e bashkisë, ndërsa sot erdhën përsëri aty me fidanë dhe lopata.
Ndërsa mbillnin fidanët e rinj të pishave, protestuesit tregonin trungjet e pemëve të prerave si shtysa kryesore e tubimeve të tyre protestuese.
Bashkia organizoi sot aty një koncert me fëmijë për të treguar kujdesin ndaj tyre dhe vendosmërinë për ta ndërtuar parkun e lojërave brenda një qershorit.
Kryetari i bashkisë Erjon Veliaj ftoi veprimtarët të shënojnë pemët dhe t'i verifikojnë ditën që do të mbarojë ndërtimi.
Ndërsa një ditë më parë ai zhvilloi një dëgjesë me veprimtarë të shoqërisë civile për ndërtimet në parkun e liqenit artificial.
Bashkia e Tiranës dhe organizatat e mjedisit si Qytetarët për Parkun, Mbill Pemën Tënde etj. po replikojnë prej disa javësh për projektet e fundit te parku i liqenit artificial.
Edhe Partia Demokratike e opozitës zhvilloi një protestë kundër projektit me lojërat.
Ndërsa veprimtarët e mjedisit kanë disa vite që protestojnë për ndërtime të ndërtime shumëkatëshe poshtë digës së liqenit dhe sipër digës, që, sipas tyre, bien në kundërshtim me ligjet mbi digat dhe me ato në mbrojtje të mjedisit.