Në Tiranë u çel sot një fondacion i ri joqeveritar për ndriçimin e krimeve të diktaturës. Studiuesit thanë se edhe sot pas 3 dekadash krimet e regjimit mbulohen me besnikëri prej pjesëtarëve të tij. Korrespondenti ynë, Ilirian Agolli, njofton nga Tirana:
Your browser doesn’t support HTML5
Tiranë: Fondacion i ri për ndriçimin e krimeve të diktaturës
Një grup studiuesish të njohur çelën sot në Tiranë Fondacionin “Kujto”, kushtuar kërkimit, studimit dhe pasqyrimit të fatit të viktimave të diktaturës komuniste në Shqipëri.
Themeluesit dhe autorët e fondacionit besojnë se shoqëria shqiptare gjendet përballë diktaturës komuniste edhe në ditët e sotme, dhe se ajo ka nevojë të përballet me krimet e diktaturës me një qasje të re ndaj saj.
“Është shumë e rëndësishme të publikohen listat e viktimave të përndjekura, të torturuara, të vrara. Kjo është shumë e nevojshme, sepse kur ne të harrojmë emrat e atyre njerëzve, diktatura ka fituar” - tha dr.Pavel Zaçek, historian, themeluesi dhe drejtori i parë i Institutit të Studimeve të Regjimeve Totalitare dhe Arkivave të Departamenteve të Sigurisë në Çeki.
Ai theksoi se mijëra oficerë, agjentë dhe bashkëpunëtorë të Sigurimit të Shtetit ndikojnë drejtpërdrejt në pengimin e demokracisë, duke u përfshirë kudo në administratën shtetërore, në politikë dhe kudo.
“Shqipëria është përballë sfidës që të ndërtojë një shtet, ku të integrohet historia traumatike e viktimave të diktaturës komuniste dhe të ndërtojë të ardhmen. Hapi i parë me rëndësi të madhe për ndërtimin e demokracisë është që të bëhet një marrëveshje mbi historinë e regjimit komunist dhe të gjendet një nivel i përbashkët, ku të njihet ai realitet” - thotë dr. Lori Amy, profesore në Departamentin e Shkrimit dhe Linguistikës në Universitetin Jugor të Xhorxhias në SHBA.
Shqipëria ka përgatitur deri tani botime si “Fjalori enciklopedik i viktimave të terrorit komunist”, Zërat e Kujtesës, kolanë botimesh studimore, të memuaristikës, konferenca shkencore si dhe pjesëmarrje aktive në jetën publike. Por historianët komunistë, pohuan studiuesit ende mbizotërojnë monopolin e institucioneve që shkruajnë dhe përcjellin historinë.
Fondacioni i sapothemeluar “Kujto.al”, që i kushton rëndësi të veçantë memories historike, është jofitimprurës, i pavarur, jo qeveritar dhe jo politik, do të merret me zbulimin e krimeve të komunizmit përmes mjeteve të reja të komunikimit dhe me informimin e qytetarëve mbi krimet e diktaturës komuniste.