Turqia ka shprehur zhgënjim të thellë lidhur me komentet e Presidentit Barak Obama në nderim të viktimave të masakrës kundër armenëve nga turqit osmanë gjatë dhe pas Luftës së Parë Botërore.
Një deklaratë e Ministrisë së Jashtme turke e lëshuar dje i cilëson komentet e zotit Obama “të njëanshme dhe shtrembërim i historisë”. Deklara thekson se fjalët e presidentit bazoheshin në politikat e brendshme amerikane dhe krijojnë vështirësi në procesin e ripajtimit mes turqve dhe armenëve.
Në komentet e së shtunës në nderim të viktimave, Presidenti Obama i cilëson zhvillimet e vitit 1915 si të tmerrshme dhe thotë se historia armene është dëshmi e triumfit mbi ata që u përpoqën ta shkatërrojnë këtë komb. Ai nuk përdori fjalën “gjenocid” që armenët këmbëngulin se përshkruan më saktë fushatën e vrasjeve kundër tyre.