Kosovë, Lista Serbe paralajmëron se do të ankimojë vendimin e KQZ-së

Lista Serbe subjekti kryesor i serbëve të Kosovës, tha të martën se do të ankohet në Panelin për Ankesa pas vendimit të një dite më parë të Komisionit Qendror të Zgjedhjeve, i cili nuk e certifikoi këtë subjekt për të marrë pjesë në zgjedhjet parlamentare të 9 shkurtit.

Kosovë, Lista Serbe paralajmëron se do të ankimojë vendimin e KQZ-së

Zyrtarë të Listës Serbe thanë sot gjatë një konference shtypi se do të shfrytëzojnë të gjitha mjetet politike dhe demokratike për të përmbysur vendimin.

“Gjatë ditës do të paraqesim ankesë në Panelin Zgjedhor dhe pres një vendim të qartë prej tyre për ta refuzuar këtë vendim të pakuptimtë, kundër serbëve dhe jodemokratik të (Albin) Kurtit”, tha kryetari i Listës Serbe, Zlatan Elek.

Ai tha se vendimi nuk ka bazë ligjore dhe është dëshmi se sa shumë dëshiron që Albin Kurti të eliminojë serbët nga këto treva.

“Jemi të vetëdijshëm për të gjitha keqbërjet që përdorë Albin Kurti ndaj Listës Serbe sepse ai e sheh listën tonë si kundërshtare serioze. Për këtë ka iniciuar procedura kundër të gjithë udhëheqësve të Listës Serbe, por edhe drejtorëve në sistemin publik që funksionojnë në kuadër të Republikës së Serbisë, duke theksuar se po luftojmë kundër rendit kushtetues të Kosovës”, tha zoti Elek.

Të hënën dy anëtarë të Komisionit Qendror të Zgjedhjeve votuan për certifikimin e kësaj liste, shtatë abstenuan, ndërsa kundër votuan përfaqësuesit e Lëvizjes Vetëvendosje, duke theksuar se kjo parti e themeluar dhe e mbështetur nga Beogradi nuk e njeh shtetin e Kosovës.

Zyrtarë të lëvizjes Vetëvendosje thanë se Lista Serbe ka përdorur emrin jokushtetues të Kosovës dhe nuk i ka dënuar sulmet e një viti më parë në Banjskë dhe atë të muajit të kaluar në kanalin e ujësjellësit në veri.

Kryetari i Listës Serbe, Zlatak Elek tha se termi "Kosova dhe Metohia” është plotësisht i ligjshëm pasi sipas tij përfaqëson një toponim.

"Dhe në vend të rroftë Republika e Kosovës thashë rroftë Republika e Serbisë. Ja, sot po ua them qartë se, para së gjithash, jam krenar që jam serb dhe krenar që i thashë ato fjalë. Qëndroj fort pas çdo fjale të shqiptuar në atë videoklip", tha ai.

Presidentja e Kosovës Vjosa Osmani në një përgjigje me shkrim për Zërin e Amerikës tha se Lista Serbe është organizatë, e cila në radhët e veta ka individë të cilët vazhdimisht kanë kryer akte terroriste si dhe kanë cenuar rendin kushtetues të Kosovës.

“Nga ana tjetër, Komisioni Qendror i Zgjedhjeve është një institucion i pavarur kushtetues, i cili vendosë në mënyrë të pavarur. Çdo vendim i nxjerrë nga KQZ-ja, duhet të respektohet, si pjesë e përkushtimit ndaj sundimit të ligjit dhe ruajtjes së integritetit institucional”, thuhet në përgjigjen e presidentes Osmani.

Kryeministri i Kosovës Albin Kurti i pyetur nga gazetarët gjatë një konference të martën në Prishtinë, tha se askush nuk ka mundur të presë qëndrim ndryshe nga lëvizja Vetëvendosje në Komisionin Qendror të Zgjedhjeve kundruall Listës Serbe.

“Kur ja shtojmë edhe sulmin terrorist në Banjskë të Zveçanit i cili është kryer nga nënkryetari i Listës Serbe Milan Radoiçiç, i cili vazhdon që edhe kësaj dite të jetë de fakto shefi i Listës Serbe, sepse eksponentët e Listës Serbe në krye me Zlatan Elek që është kryetar i Listës Serbe takohen me (Milan) Radoiçiçin në Serbi, marrin instruksione ose më saktë urdhëra prej tij, është e qartë se qëndrimi ynë si lëvizje Vetëvendosje që i kemi përfaqësuesit në KQZ nuk ka mundur të jetë ndryshe dhe në në të njejtën kohë kemi alarmuar se çfarë po ndodh”, tha ai.

Milan Radoiçiç, ish nënkryetar i Listës Serbe me lidhje me partinë në pushtet të Serbisë, është në mesin e 45 personave të akuzuar në Kosovë në lidhje me një sulm në shtator të vitit 2023 në të cilin u vra një oficer i policisë së Kosovës. Ai mori përsipër përgjegjësinë për sulmin dhe aktualisht është i lirë dhe nën hetim në Serbi, e cila refuzon ta dorëzojë në Kosovë.

Kryeministri Kurti tha se Lista Serbe nuk është distancuar nga sulmi në Banjskë të Zveçanit.

“Qëndrimi negativ, veprimet destruktive dhe sjellja penguese e Listës Serbe ndaj Republikës së Kosovës janë të njohura publikisht për të gjithë. Lista Serbe fatkeqësisht po e përfaqëson shtrirjen e gjerë dhe shkallën e lartë të ndërhyrjes së Serbisë në punët e brendshme të Kosovës dhe në zgjedhjet tona demokratike”, tha kryeministri Kurti.

Kryeministri Kurti akuzoi Beogradin se qëndron pas, siç tha, grupeve terroriste në “planifikimin, financimin dhe ofrimin e logjistikës”.

“Sulme të tjera terroriste dhe sabotazhi ndaj infrastrukturës kritike dhe objektivave tjera të rëndësishme në Kosovë, sidomos në veri, janë paralajmëruar nga organizatat terroriste që po strehohen në Serbi, duke përmendur festat e fund vitit dhe krishtlindjet ortodokse. Sulmet mund të synohet të realizohen, varësisht nga interesat politike të kreut të shtetit serb, posaçërisht tensionet e brendshme në Serbi – protestat e vazhdueshme opozitare atje”, tha Kryeministri Kurti të martën.

Lexoni edhe këtë KQZ-ja nuk e certifikon Listën Serbe për pjesëmarrje në zgjedhje - reagon ambasada amerikane

Vendimi i Komisionit Qendror të Zgjedhjeve nxiti reagime të shumta të misioneve ndërkombëtare.

Ambasada e Shteteve të Bashkuara në Prishtinë shprehu siç tha shqetësimin e thellë lidhur me veprimet e disa anëtarëve të Komisionit Qendror të Zgjedhjeve për të mos certifikuar kandidatët e Listës Serbe ndërsa e quajti vendim të nxitur nga kriteret e motivuara politikisht.

Misioni në Kosovë i Organizatës për Sigurinë dhe Bashkëpunimin në Evropë tha se e sheh me shqetësim moscertifikimin e Listës Serbe ndërsa i bëri thirrje Komisionit Qendror të Zgjedhjeve që të ruajë integritetin e procesit dhe të sigurojë që hapat e ardhshëm të jenë gjithëpërfshirës dhe në përputhje me parimet demokratike.

Vëzhguesit e procesit zgjedhor thonë se zyra për certifikimin e subjekteve politike ka rekomanduar certifikimin e Listës Serbe që nënkupton se ajo i ka plotësuar kriteret minimale ligjore për të qenë pjesë e zgjedhjeve.

Komisioni Qendror i Zgjedhjeve ka certifikuar tashmë 27 subjekte politike, prej të cilave: 19 parti politike, 5 koalicione, 2 nisma qytetare dhe 1 kandidat i pavarur, për pjesëmarrje në zgjedhjet e 9 shkurtit. Pesë nga subjektet e certifikuara janë nga radhët e komunitetit serb.