Ditari - Kosovë normalizohet furnizimi me ujë, Vuçiç mohon përfshirjen e Serbisë

Autoritetet në Kosovë thanë të dielën se po normalizohet furnizimi me ujë nga liqeni i Ujmanit ne veri të vendit, që u ndërpre përkohësisht pas shpërthimit të së premtes në mbrëmje, për të cilin Prishtina fajësoi grupet e mbështetura nga Serbia. SHBA dhe BE kanë dënuar “përdorimin e tepruar të forcës” nga policia në Gjeorgji kundër protestuesve që kanë dalë në rrugë në Tbilisi për të kundërshtuar një vendim të qeverisë për të pezulluar negociatat e anëtarësimit me BE-në. Presidenti i zgjedhur republikan Donald Trump tha të shtunën se synon të emërojë ish-zyrtarin e Këshillit të Sigurisë Kombëtare Kash Patel për të drejtuar FBI-në, duke sinjalizuar se do që ta largojë nga detyra drejtorin aktual, Christopher Wray.