Një restorant në Barcelonë të Spanjës ka dalë në krye të listës së 50 restoranteve më të mirë të botës. Por ata që shpresojnë të zënë një tavolinë në restorantin “Disfrutar”, mund të zhgënjehen. Lista e pritjes kërkon që tani për rezervimet pothuajse një vit kohë.
Your browser doesn’t support HTML5
Restoranti në Barcelonë shpallet restoranti më i mirë i botës
Emri i restorantit, “Disfrutar”, do të thotë “shijojeni”. I ndodhur në Barcelonë, ky restorant është bërë tashmë një histori suksesi befasues. Ka marrë vlerësimet më të larta nga kompanitë më të njohura, si Michelin, që inspektojnë dhe përpilojnë renditjen e restoranteve më të mira.
Tashmë restoranti “Disfrutar” ka marrë edhe vendin e parë në listën e 50 restoranteve më të mira të botës. Ky është një nderim i madh për tre kuzhinierët katalonas, Oriol Castro, Mateu Casanas dhe Eduard Xatruch, që e filluan këtë biznes disa vite më parë. Ata u njohën ndërsa punonin në restorantin legjendar “El Bulli” dhe në vitin 2012 vendosën të bëheshin partnerë dhe të çelnin restorantin e tyre të parë. Tashmë ata drejtojnë tre restorante dhe thonë se marrja e çmimit të fundit dëshmon rëndësinë e kuzhinës spanjolle.
“Në të kaluarën ishte kuzhina e madhe franceze, por pastaj filloi lëvizja këtu në Spanjë, me kuzhinën baske. U bë revolucioni me restorantin ‘El Bulli’ dhe pa dyshim ne e vazhdojmë këtë revolucion, duke marrë edhe çmimin e parë”, thotë shefi i kuzhinës Oriol Castro.
Në vitin 2015, ata u vlerësuan me yllin e tyre të parë Michelin, në vitin 2017 morën të dytin dhe në vitin 2023 të tretin.
Që në vitin 2022 arritën të renditen të tretët në listën e 50 restoranteve më të mira të botës, dhe një vit më pas u renditën të dytët. Por edhe me këtë lloj përparimi, marrja e vendit të parë ishte shokuese.
“Deri në atë moment, nuk e kishin bërë publike se ishim të parët. Nuk dinim gjë dhe kjo e bën një moment magjik. Pra është e pabesueshme, e papërshkrueshme dhe e pakrahasueshme”, thotë shefi i kuzhinës Mateu Casanas.
Faqja në internet e listës së 50 restoranteve më të mira të botës, e përshkruan restorantin “Disfrutar” si një eksperiencë unikale në jetë dhe vlerëson “gatimet me imagjinatë brilante, mjeshtëri teknike të pakalueshme dhe prezantimin lozonjar”.
Klientët mund të provojnë pjata me pesto në formë sferike, me stika të buta apo mish ngjale, si dhe një version unikal të gatimit tradicional spanjoll “tapas”.
Nuk është aspak befasuese që kërkesa për rezervime është në një nivel rekord.
“Që kur morëm çmimin, e vërteta se është shtuar problemi i rezervimeve. Më përpara kishim një listë pritjeje për shtatë apo tetë muaj. Tani është me gati një vit pritje”, thotë menaxheri i restorantit “Disfrutar”, Vicente Lara.
Marrja e çmimit i rrit edhe më shumë pritshmëritë e klientëve për ekipin e të punësuarve, që ka arritur që tani në rreth 75 veta.
Gjatë 22 viteve të fundit që është publikuar lista e restoranteve më të mirë të botës, fituesit kanë qenë tetë herë nga rajoni Katalonia në verilindje të Spanjës.