Në Tiranë protestues opozitarë dogjën sërish sot goma automjetesh para bashkisë së kryeqytetit, ndërsa kërkonin dorëheqjen e kryebashkiakut Erjon Veliaj.
Një seri protestash kanë nisur prej dy muajsh pas arrestimit nga SPAK-u nën dyshimet për korrupsion të disa drejtorëve - bashkëpunëtorë të tij.
Kjo e sotmja ishte protesta e 11-të që u zhvillua e ngjashme të tjerat; pas disa fjalimeve me akuza për korrupsionin e punonjësve bashkiakë, që e portretizonin kryebashkiakun Veliaj si bashkautor të aferave korruptive me vartësit e tij, disa protestues dogjën goma automjetesh dhe goditën me vezë forcat e policisë.
Gjatë protestës së sotme, një grup mbështetësish opozitarë u përpoqën të thyenin gardhet metalike të policisë, e cila nga ana e saj përdori bombolat zjarrfikëse ndaj gomave dhe sprajtin djegës ndaj protestuesve.
Nga përplasja dyorëshe mes palëve u dëmtuan lehtë disa qytetarë protestues, politikanë dhe punonjës të policisë së shtetit.
Disa drejtorë dhe ish drejtorë të bashkisë janë arrestuar në dhjetor dhe në maj nga SPAK-u si të dyshuar se janë të përfshirë në afera korruptive, kanë përfituar fonde publike, përmes kompanisë 5D, të cilën e kontrollonin me anë të personave të tjerë.
Një çështje tjetër në SPAK, ku janë përfshirë drejtues bashkiakë është edhe ajo e inceneratorit të Tiranës.
Zoti Veliaj është distancuar nga vartësit e arrestuar, duke thënë se cilido i dyshuar për afera duhet të përballet me drejtësinë personalisht, dhe se asnjë drejtues i lartë nuk mund të dijë se çfarë veprimesh kryejnë vartësit e tij. Zoti Veliaj është shprehur i sigurtë se prej asnjë dokumenti të nënshkruar prej tij nuk është shkaktuar korrupsion apo shpërdorim i fondeve publike.
Megjithatë, jozyrtarisht mësohet se SPAK-u ka nisur një hetim pasuror ndaj tij, duke u kërkuar bankave të dhëna mbi llogaritë dhe transaksione bankare të zotit Veliaj dhe familjarëve të tij.