Në një raport të publikuar nga Grupi për Studime Juridike dhe Politike, me seli në Prishtinë, thuhet se ngritja e së djathtës në shumë prej shteteve anëtare të Bashkimit Evropian në zgjedhjet për Parlamentin e bllokut që pritet të mbahen javën e ardhshme, mund të rrezikojë më tej ardhmërinë evropiane të Kosovës.
“Në dritën e kësaj rritjeje të së djathtës së skajshme në Parlamentin Evropian, lihet të kuptohet se ky mund të jetë edhe parlamenti më kundër Kosovës në histori të saj. Arsyet ndryshojnë, por nëse ndjekim parashikimet aktuale të paktën 20 për qind e eurodeputetëve të ardhshëm mund të jenë kundër perspektivës së anëtarësimit të Kosovës në Bashkim Evropian”, tha autori i raportit, Alejandro Esteso Perez.
Your browser doesn’t support HTML5
GSJP: Forcimi i së djathtës së skajshme në Evropë rrezikon aspiratat e Kosovës
Sipas raportit kjo mund të jetë për shkak të kundërshtimit të një pjese të eurodeputetëve ndaj zgjerimit në përgjithësi, ose për shkak të rezervave politike rreth sovranitetit dhe pavarësisë së Kosovës.
Raporti i kërkon Kosovës që pavarësisht kohërave sfiduese të vazhdojë tutje në përpjekjet e saj për integrim në Bashkimin Evropian.
Alejandro Esteso Perez
“Nuk është një kontekst ndërkombëtar i lehtë për Kosovën por nuk ka alternativë tjetër për Kosovën përveç rrugës së integrimeve evropiane”, tha zoti Perez.
Engjëllushe Morina nga Këshilli Evropian për Marrëdhënie Ndërkombëtare tha se për Kosovën është me rëndësi që të përqendrohet në marrëdhënie më të ngushta me shtetet anëtare të Bashkimit Evropian.
“Mënyra se si duhet të ndërtohen koalicionet e Kosovës me disa shtete anëtare për disa çështje kyçe që kanë kompozicionin më të madh të Parlamentit Evropian por edhe partive që janë më konservatore ose që janë të qendrës së djathtë të cilat janë në pushtet në disa shtete anëtare me ndikim në politikbërjet e Evropës për mandatin e ardhshëm, mandat që është shumë kyq jo vetëm për Evropën por edhe për Ballkanin Perëndimor dhe tri shtetet e Evropës Lindore”, tha zonja Morina.
Demush Shasha nga Instituti Epik tha se nuk sheh vullnet politik te asnjëra palë për integrime evropiane.
“Aq sa nuk po shoh vullnet në nivel të Bashkimit Evropian aq nuk po shoh në nivel këtu te ne. Nuk është lehtë të akuzosh BE-në se nuk ke vullnet, vizion por të fillojmë nga shtëpia jonë. Këtu në Ballkan po shihet qartazi në gjithë rajonin nuk ka vullnet politik për reformat që po kërkohen në rrugën tonë evropiane”, tha zoti Shasha.
Raporti thekson se Prishtina zyrtare duhet të përshpejtojë dhe forcojë reformat e saj demokratike për t'u forcuar më tej si një partner demokratik i besueshëm. Kosova gjithashtu duhet të ketë një qasje më të hapur politike kundrejt aleatëve të saj ndërkombëtarë, të cilët mund ta vendosin atë në një pozicion më të mirë veçanërisht në kuadër të dialogut me Serbinë.
Kosova mbetet shteti i fundit në rajon në procesin e integrimeve evropiane dhe një nga kushtet kryesore drejt kësaj rruge është normalizimi i marrëdhënieve me Serbinë.