Vuçiç: Milan Radoiçiç është në Serbi dhe do të merret në pyetje nga organet e rendit

Presidenti i Serbisë, Aleksandar Vuçiç, tha të mërkurën në mbrëmje se nënkryetari i Listës Serbe, Milan Radoiçiç, të cilin autoritetet në Prishtinë e kanë identifikuar si pjesë të grupit të armatosur që vrau një oficer të policisë të dielën, ndodhet në Serbi dhe do të merret në pyetje nga organet përgjegjëse serbe, duke vërtetuar kësisoj pohimet se ai ishte pjesë e grupit.

Në një intervistë për Radiotelevizionin e Serbisë, presidenti serb tha se Milan Radoiçiç “kurrë nuk është fshehur, kurrë nuk është turpëruar për rolin e tij... në diçka që ka ndodhur që nuk është në të mirë të Serbisë apo që nuk i ka sjell dobi Serbisë”.

Ai tha se nënkryetari i Listës Serbe, “e konsideron veten luftëtar të lirisë. Ai kurrë nuk ka hequr dorë nga shokët e tij dhe kurrë nuk do ta bëjë, por ka gjëra dhe çështje të cilave duhet t’u përgjigjet”.

Lexoni edhe këtë Autoritetet në Kosovë identifikojnë nënkryetarin e Listës Serbe, Milan Radojçiç si pjesëmarrës në sulmin e së dielës

Të martën ministri i Brendshëm i Kosovës, Xhelal Sveçla, publikoi pamje nga droni ku shihet një grup personash të armatosur rëndë teksa qëndrojnë në një pjesë të ndërtesave të manastirit ortodoks në fshatin Banjskë në veri të Kosovës. Në pamje theksohet se një nga ta është Milan Radojçiç, i sanksionuar nga Shtetet e Bashkuara dhe Mbretëria e Bashkuar.

Tre pjesëtarë të grupi u vranë në përleshjet e së dielës pasi sulmuan forcat e rendit në fshatin Banjskë në veri të Kosovës,

Sulmi u cilësua si akt terrorist nga institucionet e Kosovës dhe diplomatët perëndimorë.

“Për mua si president i Serbisë ata njerëz nuk mund të jenë terroristë. A mund ta justifikojë vrasjen e një polici... nuk ka asnjë justifikim dhe për këtë autoritetet shtetërore do të ndërmarrin veprime”, tha ai, duke mohuar sërish çfarëdo lidhjeje të Serbisë me grupin e armatosur dhe duke akuzuar kryeministrin e Kosovës se ka krijuar një mjedis të vështirë për komunitetin serb duke nxitur reagimin e atyre që siç tha “nuk duan të durojnë” veprimet e tij.

Lexoni edhe këtë Hovenier: Grupi i armatosur që sulmoi policinë në veri të Kosovës ishte i trajnuar dhe i organizuar

Të martën ambasadori amerikan në Prishtinë Jeff Hovenier, tha se grupi i armatosur që sulmoi policinë e Kosovës nuk kishte të bënte me ndonjë grup qytetarësh të mbledhur spontanisht, por ishte grup i trajnuar dhe i organizuar... Dhe kjo do të thotë se ka struktura pas tyre që u kanë ofruar trajnimin dhe pajisjet".