Autoritetet në Prishtinë thanë të martën se një nga pjesëtarët e grupit të armatosur që sulmoi policinë e Kosovës të dielën në veri, është nënkryetari i Listës Serbe, Milan Radojçiç.
Ministri i Brendshëm i Kosovës, Xhelal Sveçla, publikoi pamje nga droni ku shihet një grup personash të armatosur rëndë teksa qëndrojnë në një pjesë të ndërtesave të manastirit ortodoks në fshatin Banjskë në veri të Kosovës. Në pamje theksohet se një nga ta është Milan Radojçiç, i sanksionuar nga Shtetet e Bashkuara dhe Mbretëria e Bashkuar.
Your browser doesn’t support HTML5
Autoritetet në Kosovë identifikojnë nënkryetarin e Listës Serbe si pjesëmarrës në sulm
“Kryekrimineli Radojçiq ka qenë udhëheqës i këtij grupi terrorist dhe i sulmit ku mbeti i vrarë polici Afrim Bunjaku. Kjo është edhe një dëshmi tjetër mbi veprimtarinë e tij terroriste ndaj Republikës së Kosovës. Nënkryetari i Listës Serbe është prijës i sulmit terrorist dhe grupit të terroristëve”, shkroi në rrjetin Facebook ministri Sveçla
As Lisa Serbe dhe as vet nënkryetari i saj Radojçiç nuk kanë komentuar pohimet e tilla. Autoritetet në Serbi e kanë mohuar çfarëdo lidhjeje me grupin.
Lista Serbe shpalli ndërkaq tre ditë zie në zonat e banuara me shumicë serbe në kujtim të tre sulmuesve të armatosur që u vranë të dielën në përleshje me policinë. Qeveria e Serbisë e shpalli të mërkurën ditë zie.
“Ditët e zisë të shpallura sot nga Serbia dhe Lista Serbe janë tashmë vulosja e autorësisë së këtij organizimi”, shkroi ministri Sveçla.
Rama: Serbia ta ndajë mendjen nëse do të jetë me botën demokratike apo me fantazmat dhe krimet e të shkuarës së saj të palavdishme
Kryeministri shqiptar Edi Rama ka reaguar me tone të forta ndaj vendimit të qeverisë serbe për shpallen e një dite zije për pjesëtarët e grupit të armatosur të cilët mbetën të vrarë gjatë përleshjeve me policinë e Kosovës, në veriun e saj, dy ditë më parë.
“Beogradi me këtë shpallje zije që nuk ka asnjë lidhje me shekullin XXI, i fryn si asnjëherë më parë qysh prej vitit 1999, zjarrit të një konflikti të armatosur”. Sipas tij “kjo është jo vetëm e pajustifikueshme dhe e papranueshme, por e dënueshme me të gjithë forcën e fjalës e të instrumentave në dispozicion të bashkësisë euro-atlantike”.
Në reagimin e tij në rrjetet sociale, kryeministri Rama thekson se “ky është momenti që Serbia duhet ta ndajë qartë dhe prerë mendjen nëse do të jetë me Europën dhe botën demokratike të shekullit XXI apo me hijen e vetvetes së fundshekullit XX; me vlerat dhe parimet e Bashkimit Europian e të komunitetit euro-atlantik apo me fantazmat dhe me krimet e të shkuarës së saj të palavdishme të viteve ‘90; me të nesërmen europiane të fëmijëve të saj të pafajshëm apo me të djeshmen e fajshme të nacionalizmit vrasës e vetëvrasës”.
Zoti Rama po ashtu vlerëson se dhe “Bashkimi Europian dhe Shtetet e Bashkuara duhet ta ndajnë qartë e prerë mendjen nëse do ta ngrenë në nivelin më të lartë alarmin demokratik për ta ndalur përshkallëzimin e konfliktit në veriun e Kosovës, i cili ka hyrë në fazën e vet më të rrezikshme qysh prej vitit 1999 apo do të vazhdojnë t’i mbajnë Dialogun për Normalizim dhe angazhimin e KFOR-it në të njëjtin nivel krejt të pamjaftueshëm tanimë”. Sipas tij nevojitet një veprim i menjëhershëm, pasi si shkruan ai “nesër mund të jetë vonë”.
Kryeministri shqiptar ka një thirrje dhe për Kosovën, e cila “duhet të reflektojë shumë seriozisht dhe të ndajë mendjen qartë e prerë, nëse do të vazhdojë në kursin e veprimit të shkëputur nga miqtë e saj të pazëvendësueshëm dhe aleatët e saj të padiskutueshëm apo do të veprojë në harmoni e mirëkuptim me komunitetin euro-atlantik, për të arritur qëllimin më madhor në histori pas fitores së luftës e shpalljes së pavarësisë, njohjen përfundimtare si shtet anëtar i këtij komuniteti”. Sipas tij do alternativë tjetër përveç bashkëpunimit me partnerët strategjikë, është “një rrugë iluzionesh me përfundime të dhimbshme, të cilat e largojnë Kosovën nga qëllimi madhor, dhe e kthejnë në mënyrën më absurde peng të paqes në mes të Europës”, përfundon reagimin e tij zoti Rama.
Gjashtë persona u arrestuan pas përleshjeve të së dielës në fshatin Banjskë në veri të Kosovës, ku një grup personash të maskuar dhe me uniforma ushtarake sulmoi policinë e Kosovës duke vrarë një oficer dhe plagosur një tjetër.
Grupi më pas hyri me forcë në manastirin ortodoks në fshatin Banjskë duke vazhduar të qëllojë mbi policinë. Përleshja përfundoi kur shumica e sulmuesve u arratisën. Tre nga sulmuesit e armatosur mbetën të vrarë.
Sulmi u cilësua si akt terrorist nga institucionet e Kosovës dhe diplomatët perëndimorë.
Një gjykatë në Prishtinë, u shqiptoi sot masën e paraburgimit prej 30 ditësh tre personave të arrestuar për përfshirje në sulmin e së dielës. Që të tre, sipas gjykatës dyshohen për përfshirje në “vepra të rënda kundër rendit kushtetues dhe sigurisë së Republikës së Kosovës dhe kryerjen e veprave terroriste”. Për dy prej tyre masa u shqiptua në gjykatë, ndërsa për të tretin seanca u mbajt në spital ku po trajtohet për shkak të plagëve të pësuara gjatë përleshjeve.
“Dushan Maksimoviçit sot i është caktuar masa prej 30 ditësh paraburgim. Ne do të ankimojmë aktvendimin. Kemi vënë në dukje disa fakte që besojmë se janë relevante dhe që tregojnë se kjo është diçka që ndoshta është më shumë keqkuptim sesa diçka që mund të lidhet me krimin”, tha Dejan Vasiç, avokat i njërit prej të arrestuarve.
Kosova i bëri thirrje Serbisë që të dorëzojë serbët e armatosur, për të cilët tha se ishin arratisur pas sulmit të së dielës, i cili ka nxitur shqetësime të reja ndërkombëtare për qëndrueshmërinë e rajonit.