Në Kosovë flamujt në institucionet vendase dhe ambasadat perëndimore janë ulur në gjysmështizë, ndërsa vendi është në ditë zie të në shenjë nderimi ndaj pjesëtarit të policisë së Kosovës Afrim Bunjaku, i cili u vra të dielën në përleshje me një grup serbësh të armatosur.
Përleshjet vazhduan përgjatë tërë ditës së diel në fshatin Banjskë në veriun e banuar me shumicë serbe ndërsa grupi i sulmuesve u vendos në dhe përreth manastirit ortodoks në atë fshat.
Lexoni edhe këtë Vritet një pjesëtar i policisë së Kosovës në veri – mbeten të vrarë tre nga sulmuesitTre nga sulmuesit mbetën të vrarë të dielën, ndërsa autoritetet thanë se të hënën u gjet trupi i pajetë i sulmuesit të katërt. Gjashtë persona u arrestuan, dy prej të cilëve të plagosur. Policia tha se situata u vu nën kontroll mbrëmjen e së dielës por nuk u dhanë hollësi nëse pjesëtarë të tjerë të grupit të armatosur ishin larguar.
Kryeministri i Kosovës Albin Kurti tha se “bëhet fjalë për një formacion terrorist e kriminal, profesionist, i cili e ka planifikuar dhe përgatitur gjatë këtë çfarë ka kryer sot dhe që nuk paraqesin një bandë të kontrabandës, por një strukturë mercenare e cila është e përkrahur politikisht, financiarisht e logjistikisht nga Beogradi zyrtar”.
Presidenti i Serbisë Aleksandar Vuçiç, i cili të hënën diskutoi situatën në Kosovë me ambasadorin rus në Beograd, Alexander Botsan-Kharchenko, tha të dielën në mbrëmje se grupi i sulmuesve përbëhej nga serbë të Kosovës që sipas tij “nuk duan të durojnë më terrorin e (Albin) Kurtit”.
“Nuk dua të arsyetoj vrasjen e policit. Është për t’u dënuar dhe nuk i duhet askujt, më së paku serbeve kur dihet se Kurti është shkaktari i kaosit në Kosovë”, tha presidenti i Serbisë, i cili mohoi çfarëdo lidhjeje të Beogradit me sulmin e së dielës.
Lexoni edhe këtë Vuçiç: Kurti fajtor për çdo gjë në Kosovë – KFOR-i dha lejen për vrasjen e serbëve të rrethuar në manastirVrasja e pjesëtarit të policisë së Kosovës, nxiti reagime në shkallë të gjerë të institucioneve vendase e ndërkombëtare.
Bashkimi Evropian dënoi sërish të hënën sulmin “e tmerrshëm dhe terrorist” kundër policisë së Kosovës, duke bërë thirrje që palët të kthehen në tryezën e bisedimeve.
Lexoni edhe këtë Dënohet gjerësisht vrasja e pjesëtarit të policisë së KosovësGjermania dërgoi në Prishtinë përfaqësuesin e saj për Ballkanin Perëndimor Manuel Sarrazin, i cili e cilësoi “të tmerrshme” situatën e së dielës.
“E dënojmë fuqishëm këtë sulm kriminal dhe terrorist ndaj policisë së Kosovës. Jemi këtu për të shprehur solidaritetin dhe ngushëllimet për familjarët, policinë e Kosovës dhe të gjithë shtetin”, tha ai pas takimit me kryeministrin e Kosovës, Albin Kurti.
Sulmi i së dielës ndodhi në një periudhë përpjekjesh të vështira për normalizimin e marrëdhënieve ndërmjet Kosovës dhe Serbisë, mes shqetësimeve të dioplomatëve se Rusia mund të përdorë Beogradin për të nxitur konfliktet etnike në Ballkan, për të tërhequr vëmendjen e botës nga agresioni i saj në Ukrainë.