Ka nisur seanca në ngarkim të ish presidentit Donald Trump. Në gjykatën federale në Uashington, DC, ai pritet t'i përgjigjet akuzave se është përpjekur për të përmbysur rezultatin e zgjedhjeve presidenciale të vitit 2020.
Gjykata federale ndodhet jo shumë larg ndërtesës së Kapitolit, ku mbështetësit e tij sulmuan në përpjekje për të bllokuar transferimin paqësor të pushtetit te demokrati Joe Biden.
Prokurori i posaçëm Jack Smith, është pranishëm në sallën e gjyqit ku do të zhvillohet procesi ndaj të ish Presidentit.
Zoti Smith ishte gjithashtu i pranishëm edhe në seancën e parë ndaj zotit Trump mbi çështjen lidhur me akuzat për marrje dhe mbajtje të paligjshme të dokumentave të klasifikuara në pronën e tij Mar-a-Lago, në Palm Beach, të Floridas.
Autokolona e zotit Trump kaloi nëpër rrugët e mbushura me njerëz të kryeqytetit amerikan, duke përdorur drita dhe sirena - një udhëtim i dokumentuar edhe një herë me mbulimin e kanaleve kabllove. Dëshmitarët rrethuan rrugët ndërsa ish-presidenti mbërriti në gjykatë
Zoti Trump udhëtoi nga qyteti Bedminster, në Nju Xhersi, drejt Uashingtonit, për t’u paraqitur në gjykatë. Seanca në ngarkim të ish presidentit pritet të nisë në orën 16.00 me orën lokale në Uashington.
Ish presidenti Donald Trump duke u ngjitur në avionin e tij në aerportin Newark Liberty International Airport, në Neuark, Nju Xhersi, 3 gusht, 2023.
Pas mbërritjes në Gjykatë, zoti Trump do të vihet nën arrest dhe pritet t’i nënshtrohet procedurave ligjore, si marrja e shenjave të gishtërinjve.
Pritet që zoti Tump të deklarojë se është i pafajshëm për akuzat se kishte bërë komplot për të shkelur të drejtën e amerikanëve për të votuar, komplot kundër qeverisë, pengim të një procesi zyrtar dhe komplot për të penguar një procedurë zyrtare.
Ai pritet të lihet i lirë në pritje të gjyqit.
Në aktpadinë prej 45 faqesh, të bërë publike të martën, prokurorët e udhëhequr nën drejtimin e prokurorit të posaçëm Jack Smith, e akuzojnë ish-presidentin se donte të sabotonte demokracinë, duke dashur të përmbysë rezultatin e zgjedhjeve.
Çështjen ndaj ish-presidentit do ta gjykojë gjykatësja federale, Tanya Chutkan, që njihet si një nga ndëshkueset më të ashpra të personave që sulmuan Kapitolin. Megjithatë seancën e sotme për paraqitjen e akuzave e drejton, një gjykatëse tjetër, Moxila Upadhyaya.
Your browser doesn’t support HTML5
Trump para gjykatës pas akuzave për përpjekje për të përmbysur rezultatin e zgjedhjeve
MASAT E SIGURISË
Në zonën përreth gjykatës ku pritet të zhvillohet seanca në ngarkim të ish presidentit janë marrë masa të rrepta sigurie.
Shërbimet sekrete dhe agjenci të tjera ligjzbatuese po mbikqyrin nga afër situatën.
Forcat e sigurisë qëndrojnë para gjykatës ku pritet të paraqitet ish presidenti Donald Trump.
Gjykata ndodhet shumë pranë Kapitolit, që u bë skenë e trazirave të 6 janarit.
Megjithatë autoritetet thonë se deri tani nuk ka kërcënime të besueshme për organizim të protestave.
SI PRITET TË NDIKOJË ÇËSHTJA NË NGARKIM TË TIJ NË FUSHATËN E ZOTIT TRUMP?
Nga pikëpamja praktike, nuk pritet të ndikojë. Në bazë të Kushtetutës edhe nëse dënohet, zoti Trump nuk është i detyruar të ndërpresë fushatën elektorale dhe nëse fiton mund të shërbejë si president. Ndikimi politik është më pak i qartë.
Zoti Trump ka treguar aftësinë për të kapërcyer skandale që mund të fundosnin shumë politikanë, dhe dy akptadi të tjera penale në ngarkim të tij nuk kanë ndikuar në fushatën e tij zgjedhore. Ai kryeson listën e kandidatëve republikanë që synojnë të fitojnë emërimin e partisë për zgjedhjet presidenciale të vitit të ardhshëm.
KUR PRITET TË NISË GJYQI?
Kjo mbetet e paqartë, por me gjasë do të zhvillohet pas shumë muajsh. Një gjykatës do të caktojë një datë fillestare për gjyqin, por përgjithësisht kjo datë shtyhet pasi të dyja palët përlasen mbi argumentet ligjore dhe shqyrtimin e provave. Po ashtu, zoti Trump mund të apelojë vendimet e gjykatësit, përpara gjyqit, gjë që do ta ngadalësonte më tej çështjen.
Media dhe protesutesit mblidhen para gjykatës ku do paraqitet ish presidenti Donald Trump
SFIDAT LIGJORE NDAJ ZOTIT TRUMP
Kjo është aktpadia e tretë penale ndaj zotit Trump në më pak se 6 muaj.
Ai u akuzua në muajin qershor nga ekipi i prokurorit të posaçëm Jack Smith për marrje dhe mbajtje të paligjshme të dokumentave të klasifikuara në pronën e tij Mar-a-Lago, në Palm Beach, të Floridas, si dhe për fshehjen e tyre nga hetuesit.
Në mars, ai u akuzua në Nju Jork për falsifikim të të dhënave të sipërmarrjes, në lidhje me një pagesë për të siguruar heshtjen e një aktoreje të filmave pornografikë.
Gjithashtu, prokurorët në Qarkun Fulton, të Xhorxhias, po përgatisin njoftimin për akuza në javët në vazhdim në lidhje me përpjekjet për të përmbysur rezultatin e zgjedhjeve të vitit 2020 në këtë shtet.