Në takimin e nivelit të lartë të NATO-s vitin e kaluar në Madrid, aleanca për herë të parë e njohu Kinën si një sfidë sigurie. Javën e ardhshme, ndërsa krerët e NATO-s takohen për një takim të nivelit të lartë në Vilnius të Lituanisë, ata do të ndërmarrin veprime konkrete. Korrespondentja e Zërit të Amerikës pranë Shtëpisë së Bardhë, Patsy Widakuswara, i hedh një vështrim nevojës së NATO-s për të krijuar një qasje koherente ndaj asaj që e sheh si kërcënim ndaj Kinës dhe pengesave që mund të hasë për ta bërë një gjë të tillë.
Your browser doesn’t support HTML5
NATO do të kërkojë veprime konkrete ndaj Kinës në takimin e Vilnusit
Lufta në Ukrainë dhe tensionet në ngushticën e Tajvanit janë gjeografikisht të largëta. Por gjeopolitikisht, të dyja janë të ndërlidhura, tha Sekretari i Përgjithshëm i NATO-s Jens Stoltenberg në fillim të këtij viti në Tokio.
“Nëse presidenti Putin fiton në Ukrainë, kjo do të dërgonte mesazhin se regjimet autoritare mund të arrijnë qëllimet e tyre përmes forcës brutale. Kjo është e rrezikshme. Pekini po shikon nga afër dhe po nxjerr mësime që mund të ndikojnë në vendimet e tij në të ardhmen".
Nëse udhëheqësi kinez Xi Jinping vendos të pushtojë Tajvanin, Shtetet e Bashkuara dhe NATO-ja mund të tërhiqen pa dashje në konflikt – një emergjencë që aleanca duhet të planifikojë. Vitin e kaluar në Takimin e Madridit, Koncepti Strategjik i NATO-s e quajti Kinën “sfidë sistemike për sigurinë euroatlantike”.
Këtë vit në takimin e Vilniusit, në Lituani, ata do të duhet ta kthejnë konceptin në veprim.
Përtej Tajvanit dhe shqetësimeve për lirinë e lundrimit, NATO-ja është e shqetësuar nga kontrolli në rritje i Pekinit mbi infrastrukturën kritike evropiane si rrjeti 5G, dhe ndikimi i funksionimit të tij.
"Pra, aktivitetet kibernetike dhe hibride, por edhe më në përgjithësi, ndikimi politik kinez në Evropë është sigurisht një shqetësim në rritje", thotë Anca Agachi me Këshillin e Atlantikut.
Partnerët e Indo-Paqësorit - Australia, Japonia, Zelanda e Re dhe Koreja e Jugut morën pjesë në takimin e nivelit të lartë të NATO-s vitin e kaluar dhe do të marrin pjesë përsëri në Vilnius.
"Këto vende të Indo-Paqësorit, kanë një përvojë unike duke u angazhuar me Kinën dhe mund të sjellin një perspektivë të vlefshme në diskutim" tha John Kirby me Këshillin e Sigurisë Kombëtare.
Ndërsa aleatët mund të bien dakord se sfida e Kinës është reale, ata ndryshojnë në mënyrën se si ta trajtojnë atë.
Shumë vende evropiane mbështeten shumë në investimet dhe tregtinë kineze. Sipas të dhënave të BE-së, Kina përbën pothuajse 10% të eksporteve të Evropës dhe rreth 20% të importeve të saj.