Departamenti amerikan i Mbrojtjes nuk do të urdhërojë një ndryshim të gjerë të procedurave të sigurisë, pas një raporti të përpiluar pas daljes së paautorizuar të qindra dokumentave të klasifikuara më herët këtë vit në një platformë të mediave sociale që është bërë popullore për përdoruesit e lojërave elektronike.
Rezulatet e një inspektimi 45-ditor, të publikuara të mërkurën, bëjnë në fakt thirrje për një sërë masash për forcimin e rregullave ekzistuese të sigurisë dhe përmirësimin e komunikimit, në mënyrë që zyrtarët që menaxhojnë mjediset me materiale të klasifikuara të marrin paraprakisht të gjitha masat e nevojshme.
“Inspektimi gjeti se shumica dërrmuese e personelit të Departamentit të Mbrojtjes me qasje tek Informacioni i Klasifikuar i Sigurisë Kombëtare (CNSI) janë të besueshëm, dhe se të gjithë komponentët e Departamentit të Drejtësisë kanë një angazhim të fortë ndaj sigurisë”, shkruajti në një memorandum më 30 qershor Sekretari i Mbrojtjes Lloyd Austin.
Por, ai shtoi se inspektimi “identifikoi fusha ku mundemi dhe duhet të përmirësojmë llogaridhënien”.
Zyrtarët e Pentagonit e njoftuan inspektimin për herë të parë në muajin prill pas arrestimit të ushtarakut të Gardës Ajrore Kombëtare, 21-vjeçarit Jack Teixeira.
Lexoni edhe këtë I dyshuari për publikimin e dokumenteve sekrete, në gjykatë për t'u përballur me akuzatNdaj tij janë ngritur gjashtë akuza për marrje të qëllimshme dhe transmetim të informacionit të klasifikuar, nxjerrjen e dokumentave të zbulimit nga një mjedis i sigurtë pune dhe publikimin e tyre, së bashku me foto dhe dokumenta të tjera, për një grup të vogël personash në rrjetin Discord.
Zoti Teixeira u vetëdeklarua i pafajshëm gjatë një seance gjyqësore muajin e kaluar dhe vazhdon të mbahet nën arrest deri në përfundim të çështjes.
Pentagoni është përpjekur tashmë të zvogëlojë numrin e punonjësve me qasje në informacionet sekrete dhe zyrtarët thanë se rekomandimet e reja janë në vazhdimësi të këtyre hapave.
“Nuk pati një hallkë të vetme që dështoi”, tha një zyrtar i lartë i mbrojtjes të mërkurën, ndërsa bisedonte me gazetarët për gjetjet e inspektimit, pasi kërkoi t’i ruhej anonimiteti.
“Ajo që shohim këtu është një ekosistem në rritje të objekteve të klasifikuara dhe të personelit me çertifikata sigurie”, tha zyrtari. “Brenda kësaj kemi mundësinë për të qartësuar politikat... ato nuk janë gjithnjë dokumentat më të qarta”.
Pentagoni i fotografuar nga ajri
Zyrtari tha se këtu përfshihen masat për t’u siguruar se personeli i Departamentit të Mbrojtjes kuptojnë kur dhe si të raportojnë shkeljet e protokolleve të sigurisë.
Zyrtari gjithashtu tha se po bëhen përpjekje për t’u siguruar që punonjësit të kontrollohen vazhdimisht dhe që menaxherët të kenë informacionin që iu nevojitet për të anuluar çertifikatat e sigurisë, nëse diçka në historikun e punonjësit e bën këtë masë të domosdoshme.
Sfidat e tjera të përmendura në raport kanë të bëjnë me përmirësimin e sigurisë fizike, përfshirë autorizimin për vendosjen e sistemeve gjurmuese që do të identifikonin nëse një celular apo paisje të tjera të ndaluara sillen në një objekt të sigurtë.
Sipas një raporti të vitit 2017 të Zyrës së Drejtorit të Zbulimit Kombëtar, rreth 4 milionë persona në Shtetet e Bashkuara kanë çertifikata sigurie, nga të cilët 1.3 milionë janë të çertifikuar për qasje tek informacioni tepër sekret.
Avril Haines
Pasi u bë e njohur rrjedhja e dokumentave në rrjetin social Discord, Drejtorja e Zbulimit Kombëtar, Avril Haines e quajti incidentin, “shumë dekurajues... shumë shqetësues”.
Por, ajo gjithashtu u bëri thirrje zyrtarëve të mos e teprojnë me reagimin.
“Ajo që të gjithë po përpiqemi të bëjmë është që të nxjerrim mësimet e duhura dhe të mos e teprojmë më pas”, tha zonja Haines. “Ajo çfarë dua të them është nxitja e praktikave më të mira, duke mos dëmtuar ndërkohë kapacitetet për të shkëmbyer informacion dhe për t’u angazhuar për përmbushjen e misionit tonë”.