Sekretari amerikan i Mbrojtjes Lloyd Austin vizitoi të enjten Estoninë, ku Shtetet e Bashkuara dhe vendet e NATO-s kanë rritur numrin e forcave ushtarake, në kuadrin e përpjekjeve për të forcuar mbrojtjen në mbarë krahun lindor të NATO-s. Korrespondentja e Zërit të Amerikës Carla Babb pati mundësinë të bisedojë me ushtarët amerikanë të dislokuar në Estoni.
Your browser doesn’t support HTML5
Mes ushtarëve amerikanë që gjenden në pikën më të afërt të kufirit me Rusinë
Këtu janë ushtarakët amerikanë që gjenden më afër kufirit me Rusinë...
Ata po stërviten në vendit aleat, Estoninë, se si t’i marrin territor armikut.
“Objektivi përfundimtar është që kjo togë të marrë pjesën më të rëndësishme të terrenit, aty ku ndodhen llogoret e armikut”, thotë Majori amerikan Jayson Szorady.
Ushtarët amerikanë, pjesë e Divizionit 101 Parashutist, eliminuan pozicionet mbrojtëse të armikut në këtë pikë stërvitore vetëm 50 kilometra nga Rusia, e cila sulmoi një vit më parë Ukrainën fqinje, një vend jo-anëtar i NATO-s.
Skenarët e stërvitjes janë simulime të luftimeve reale në Ukrainë.
“Me të gjitha stërvitjet duam të ofrojmë mjedisin sa më realist për ushtarët dhe drejtuesit që të përgatiten për këto lloj sfidash në të ardhmen”, thotë Major Szorady.
Edhe pasi marrin objektivin, ata vazhdojnë të gjenden nën zjarrin e armikut.
Togerja Liz Fursova stërvit njësinë për përdorimin e armëve në fushë të hapur.
“Prisnim që armiku të kishte përforcime, madje edhe një autoblindë luftarake të këmbësorisë”, thotë ajo.
Ushtarët godasin autoblindën me një armë kundërtank AT4, që i ngjason raketave kundërtank Javelin që janë dërguar në Ukrainë.
Megjithëse armiku këtu ështu i simuluar, sfidat janë reale. Gjatë 20 viteve të fundit, ushtarët janë mësuar kryesisht me luftime në shkretëtirë. Këtu ata po krijojnë një lloj të ri gatishmërie.
“Shumë nga ushtarët nuk kanë parë ndonjëherë borë, pra është sfiduese të veprojnë në këtë mjedis”, thotë Major Jayson.
Rreth 200 kilometra në veriperëndim qëndrojnë në gatishmëri sistemet e raketave HIMARS, të ruajtura nga njësitë e Divizionit të Parë të Këmbësorisë të vendosura mes pyjeve me pisha.
“Kemi kapacitetin të godasim ndërsa lëvizim. Mund të fshihemi për një kohë të gjatë në pozicione të mbuluara mirë. Kur jepet urdhëri, paisja bëhet gati për zjarr në pak sekonda”, thotë Majori Scott Clark.
Raketat HIMARS në Estoni
Raketat HIMARS mbërritën në dhjetor në kuadrin e shtimit të pranisë së forcave amerikane në Baltik. Në fillimin e vitit të kaluar, gjendeshin rreth 600 forca amerikane në tre vendet baltike. Tashmë aty janë rreth 1500.
Koloneli Richard Ikena drejton forcat e artilerisë së Divizionit të Parë të Këmbësorisë. Ai thotë se njësitë ushtarake me raketat HIMARS janë stërvitur edhe më parë në Estoni, por se këtë radhë është ndryshe, pasi ata tashmë janë pjesë afatgjatë e mbrojtjes kolektive të Estonisë.
“Këtu kemi skenarë realë... Na sjell në kohë reale ato që po ndodhin dhe na përgatit në kohën më të shpejtë të mundshme”, thotë ai.
Stërvitje me municion të vërtetë luftarak, vetëm pak kilometra nga kufiri i Rusisë.