Në Shtetet e Bashkuara të Amerikës të lindurit mes viteve 1997-2012 njihen si gjenerata Z. Një pjesë e kësaj gjenerate është tashmë në moshë madhore. Por në planet e tyre nuk bëjnë pjesë elementët e një jete familjare, si një punë e qëndrueshme, apo blerja e shtëpisë. Korrespodentja e Zërit të Amerikës Karina Bafradzhian bisedoi me disa të rinj të këtij brezi për të mësuar më shumë për prirjet e tyre.
Your browser doesn’t support HTML5
Gjenerata Z: Në fillim udhëtimet, më pas puna
Lieblein 23 vjeç i përket gjeneratës Z, ose sikurse njihen ndryshe “zoomers”.
Në vitin 2021, teksa ishte ende studente, ajo i harxhoi të gjitha shpenzimet në një udhëtim në Europë. Nuk është penduar aspak për këtë, madje sot ajo po u flet mijëra ndjekësve në TikTok duke i nxitur të bëjnë të njëjtën gjë.
“Mund t’i mbledh prapë aq para sa harxhova, por nuk do jem kurrë edhe një herë 20 vjeç në një udhëtim”.
Lieblein u diplomua së fundmi dhe tani po punon si inxhiniere kompjuterike. Megjithatë përparësia e saj nuk është karriera, por udhëtimi.
“Udhëtimi në 19 vende të ndryshme të Europës e ka ndryshuar botëkuptimin tim. Kisha firmosur një kontratë për të punuar çdo ditë dhe shumë orë. Por ndryshova mendje. E lashë atë punë dhe kam nisur një punë tjetër që më mundëson një balancë më të mirë mes të punuarit dhe të jetuarit. Shpresoj që të punoj nga shtëpia”.
Edhe studentja 22 vjeçare Cameon Wade shpreson që të mund të ndërthurë punën me udhëtimet. Studentja e kinematografisë beson se internet ka ndryshuar idenë tradicionale se që të punosh, duhet të shkosh në zyrë.
“Interneti është një aspekt shumë i rëndësishëm për gjeneratën tonë. Ne mund të komunikojmë me shumë njerëz duke qenë në shtëpi”.
Këta të rinj thonë se për ta ka rëndësi t’i kushtojnë kohë vetes dhe të ndërthurin aspekte të rëndësishme të jetës së tyre.
“Prindërit më thonin se nuk duhej ta lija punën që kisha, edhe pse e urreja. Më thonin se duhej të shtrëngoja dhëmbët e ta mbaja vendin e punës, sepse do vinte një ditë, që do kisha pozicionin që doja. Por gjenerata jonë nuk do të humbasë kohë. Nuk duam të jemi besnikë ndaj një kompanie, që nuk plotëson interesat tona”.
Sipas Qendrës Kërkimore Pew, gjenerata Z përfaqëson brezin më të arsimuar në historinë amerikane, teksa 57% e kësaj gjenerate shkon në kolegj, apo universitet.
Sociologët bien dakord se fakti që të rinjtë nuk duan një përvojë pune tradicionale nuk i bën ata më pak produktivë. Ekspertët thonë se eksperiencat në rininë e tyre mund t’i ndihmojnë në të ardhmen.
“Studimet tregojnë se njerëzit që shpenzojnë për të krijuar përvoja janë më të lumtur se ata që shpenzojnë për të mira materiale”.
Ekspertët thonë se deri në vitin 2025, punëtorët e gjeneratës Z do të përbëjnë mbi një të katërtën e fuqisë punëtore në Shtetet e Bashkuara.