Një armëpushim që do të bënte të mundur evakuimimin e ukrainasve nga dy qytete dështoi të shtunën, ndërsa Ukraina akuzoi Rusinë se forcat e saj kishin vazhduar bombardimet duke mos lejuar largimin e civilëve.
Ukraina thotë se forcat ruse po vazhdojnë të bombardojnë rrugët për të cilat ishte rënë dakord të përdoreshin si korridore evakuimi për të dalë nga Mariupoli dhe Volnovakha. Armëpushimi ishte planifikuar të hynte në fuqi në mëngjes.
Komiteti Ndërkombëtar i Kryqit të Kuq tha se nga infomacioni që kishte, evakuimet e civilëve nuk do të fillonin të shtunën për shkak të luftimeve.
Zëdhënësi i Ministrisë ruse të Mbrojtjes, Igor Konashenkov kishte thënë se pala ruse shpalli një armëpushim dhe hapjen e korridoreve humanitare për të lejuar civilët të largohen nga Mariupoli dhe Volnovakha. Korridoret humanitare dhe rrugët dalëse janë rënë dakord me palën ukrainase".
Sekretari amerikan i Shtetit, Antony Blinken, tha se forcat ruse "po përdorin gjithnjë e më shumë metoda brutale në Ukrainë, duke përfshirë sulmet ndaj popullatës civile".
Shërbimet britanike të zbulimit thanë se shkalla e sulmeve ajrore dhe artilerisë ruse në Ukrainë gjatë 24 orëve të fundit ka qenë më e ulët, por forcat ruse besohet se po përparojnë në jug të vendit.
“Ukraina vazhdon të mbajë qytetet e rëndësishme Kharkiv, Chernihiv dhe Mariupol”, tha ministria britanike e Mbrojtjes në Twitter herët të shtunën. "Ka pasur raporte për luftime në rrugë në Sumy. Ka shumë të ngjarë që të katër qytetet të jenë të rrethuara nga forcat ruse".
Ministria tha se forcat ruse me gjasë po përparonin në qytetin port jugor të Mykolaivit dhe ekziston një mundësi reale që disa forca të përpiqen të anashkalojnë qytetin për t'i dhënë përparësi përparimit të tyre drejt Odesës.