Sekretari amerikan i Mbrojtjes Lloyd Austin thotë se administrata e Presidentit Biden është e angazhuar të forcojë lidhjet euro-atlantike dhe njëkohësisht të garantojë sigurinë në krahun lindorë të NATO-s.
Duke folur në Bukuresht të mërkurën, zoti Austin vlerësoi Rumaninë se ka dhënë "një shembull të rëndësishëm për angazhimin e aleancës për ndarjen e përgjegjësisë" dhe modernizimin në sektorin e mbrojtjes.
Rumania është një nga vendet e pakta të NATO-s që shpenzon më shumë se 2 për qind të prodhimit të saj të brendshëm bruto për mbrojtjen, duke përdorur 20 për qind të atyre shpenzimeve drejt modernizimit: dy objektiva kryesore të NATO-s për shpenzimet.
Në këtë vend janë gjithashtu 1 mijë forca amerikane që ndihmojnë në ruajtjen e sigurisë së rajonit të Detit të Zi.
Sekretari Austin falënderoi Rumaninë për kontributin e saj në Afganistan, nga ku trupat amerikane dhe ndërkombëtare u tërhoqën në fillim të këtij viti.
Vendet e NATO-s, duke përjashtuar Shtetet e Bashkuara, humbën më shumë se një mijë anëtarë të ushtrive të tyre në luftën 20-vjeçare. Rreth 2,400 amerikanë vdiqën në luftën e Afganistanit.
Bradley Bowman, një veteran i luftës në Afganistan dhe ekspert i mbrojtjes në Fondacionin për Mbrojtjen e Demokracive, i tha Zërit të Amerikës se ai beson se reputacioni i Shteteve të Bashkuara "është njollosur" si rezultat i asaj që ndodhi në Afganistan.
Presidenti Joe Biden ka vazhduar të mbrojë tërheqjen, duke e quajtur"vendim të duhur, vendim të menduar, vendimim më të mirë për Amerikën."
Takimi i ardhshëm ministror i NATO-s të enjten dhe të premten do të jetë i pari që nga rënia e Kabulit, dhe zoti Bowman tha se zotit Austin do t’i duhet të përballet me shqetësimet nëse aleatët mund të mbështeten tek SHBA për respektimin e angazhimeve të saj të mbrojtjes ndaj tyre.
Zyrtarët e mbrojtjes i thanë Zërit të Amerikës se zoti Austin dhe aleatët e NATO-s do të diskutojnë se ku duhet të drejtohet vëmendja e tyre tani që trupat e NATO-s janë larguar nga Afganistani.
Vizita e Sekretarit Austin në Rumani pason vizitat në Ukrainë dhe Gjeorgji, dy vende që aspirojnë të hyjnë në NATO dhe që janë pushtuar pjesërisht nga forcat ruse dhe ato të mbështetura nga Rusia.
Tensionet mes Rusisë dhe NATO-s janë rritur. Rusia njoftoi të hënën se po pezullonte misionin e saj të përhershëm në NATO në përgjigje të dëbimit të tetë rusëve nga aleanca në fillim të këtij muaji.
Duke folur në Kiev të martën, zoti Austin e quajti Rusinë një "pengesë" për çdo zgjidhje paqësore të konfliktit në lindje të Ukrainës.
"Ne i bëjmë thirrje përsëri Rusisë t'i japë fund pushtimit të Krimesë, të ndalë nxitjen e luftës në Ukrainën Lindore, të ndërpresë aktivitetet e saj destabilizuese në Detin e Zi dhe përgjatë kufijve të Ukrainës," tha zoti Austin.