Disa vende të NATO-s kërkuan të premten që evakuimet nga Kabuli të vazhdojnë përtej afatit aktual amerikan të 31 gushtit, sepse shumë njerëz që kërkojnë largim të sigurt pas rënies së Afganistanit në duart e talibanëve, janë bllokuar jashtë aeroportit.
Mijëra afganë të cilët mund të jenë nën kërcënim nga talibanët dhe disa shtetas të huaj po përpiqen me dëshpërim të hyjnë në aeroport.
Sekretari i Përgjithshëm i NATO-s Jens Stoltenberg tha se shumë nga 30 vendet e NATO-s kishin dërguar aeroplanë për të evakuuar njerëzit e rrezikuar, por kishte më shumë kapacitet në avionë sesa njerëz të gatshëm për të hyrë në avionët në dispozicion për shkak të kaosit jashtë aeroportit.
"Paradoksi është se ne kemi më shumë sedilje në aeroplanët që tashmë ndodhen atje sesa njerëz ose pasagjerë", tha ai pas një takimi urgjent të ministrave të jashtëm të NATO -s.
Duke folur në një konferencë tjetër për shtyp, ministrja e jashtme belge Sophie Wilmes tha se vetëm 16 nga 450 njerëzit që Brukseli ishte përpjekur të evakuonte të premten u paraqitën në aeroport.
Lexoni edhe këtë Vazhdojnë mes kaosit evakuimet e amerikanëve dhe afganëve nga KabuliMë shumë se 18,000 njerëz janë evakuuar nga Kabuli që kur talebanët pushtuan kryeqytetin të dielën, tha një zyrtar i NATO -s.
Stoltenberg u tha gazetarëve se NATO -ja duhej të qëndronte e bashkuar për t'i bërë ballë veprimeve "agresive" të Rusisë dhe ngritjes së Kinës.
"Ndryshimi i ekuilibrit global të fuqisë, veprimet agresive të Rusisë dhe ngritja e Kinës e bëjnë edhe më të rëndësishme që ne të mbajmë një lidhje të fortë transatlantike", tha ai.
Pas gati dy dekadash, NATO këtë verë përfundoi operacionet ushtarake në Afganistan dhe tërhoqi shumicën e trupave nga vendi pas vendimit të Presidentit amerikan Joe Biden për të tërhequr trupat amerikane.
Aleanca e NATO-s ka ende një përfaqësim diplomatik në Kabul. NATO, me seli në Bruksel, shërben gjithashtu si një forum për koordinimin e masave në Afganistan, përfshirë evakuimin e shtetasve të vendeve të saj nga ky vend.