Gjatë një incidenti me armë zjarri të dielën herët në mëngjes në një tavernë në shtetin e Uiskonsinit u vranë tre persona dhe u plagosën rëndë dy të tjerë. Lajmi u konfirmua nga një zyrtar i departamentit të policisë.
Të shtënat ndodhën në tavernën “Somers House” e cila ndodhet në në Somers të kontesë Kenosha, tha rreshteri David Wright.
Personi i dyshuar si autor i ngjarjes nuk është kapur ende. Zoti Wright tha se incidentit dukej të ishte "i izoluar dhe me objektiv të përcaktuar", dhe se autoritetet nuk besojnë se publiku i gjerë ishte në rrezik.
Zyrtarët po punojnë për të përcaktuar identitetin e personave që humbën jetën. Dy të plagosurit u dërguan në një nga spitalet e zonës.
Rruga që çon tek taverna vazhdon të jetë e mbyllur ndërsa autoritetet po hetojnë incidentin më të fundit në një varg incidetesh të tilla me armë zjarri në të gjithë vendin, përfshirë vrasjet e tetë personave në një objekt të kompanisë FedEx të enjten në Indianapolis.
Muajin e kaluar, katër persona u vranë me armë zjarri në një zyrë në Kaliforni, tetë të tjerë u qëlluan për vdekje në një sallon bukurie në zonën e Atlantës dhe 10 persona humbën jetën gjatë një incidenti me armë zjarri në një supermarket në Boulder të Kolorados.