Presidenti i Shteteve të Bashkuara, Joe Biden kohët e fundit bëri publik një plan investimesh prej 2 trilionë dollarësh që ka si synim modernizimin e rrugëve, urave të vendit, dhe elementëve të tjerë të infrastrukturës së vendit. Plani, megjithatë, pritet të përballet me pengesa në Kongres.
Your browser doesn’t support HTML5
Sfidat e planit 2 trilionë dollarësh të Presidentit Biden për infrastrukturën
Plani i Presidentit Biden për infrastrukturën ka një përkufizim të gjërë mbi atë që llogaritet si infrastrukturë. Ai nuk përfshinë vetëm riparimin e rrugëve dhe urave, por edhe zgjerimin e internetit kabllor dhe përmirësimin e teknologjisë për të zbutur ndryshimet klimatike.
“Ky është një moment që mund të ndodhë një herë në jetë. Nuk mendoj se në 50 vitet e ardhshme, ne do të shohim një rast tjetër kur të kemi këtë kombinim të një nevoje të demonstruar, interesit dypartiak, padurimit të përhapur dhe një presidenti shumë mbështetës i cili është i përkushtuar, jo vetëm për përmirësimin e infrastrukturës, por edhe për vendet e punës që ky projekt do të krijojë”, tha Sekretari i Transportit, Pete Buttigieg.
Plani i Presidentit Biden përfshin krijimin e një fuqie punëtore për energjinë e pastër dhe shndërrimin e kujdesit për të moshuarit në një profesion më vete.
Udhëheqësit republikanë thonë se propozimi është shumë i gjerë. Paketa parashikon ndërtimin e një rrjeti prej 500,000 stacionesh të karikimit të makinave elektrike deri në vitin 2030.
“Kur njerëzit mendojnë për infrastrukturën, ata mendojnë për rrugët, urat, portet dhe aeroportet. Këto përbëjnë një pjesë shumë të vogël të asaj që ata po e quajnë projekt të infrastrukturës", tha senatori republikan Roy Blunt.
Financimi i këtij projekti është gjithashtu një problem. Paketa propozon rritjen e taksave për korporatat, që kundërshtohet nga republikanët.
Projekt-ligji tani po shqyrtohet nga Kongresi dhe udhëheqësit demokratë synojnë ta miratojnë në muajt e ardhshëm. Paketa do të jetë një provë për unitetin e partisë demokrate. Nëse zoti Biden nuk mund të marrë mbështetje nga asnjë republikan, ai do të ketë nevojë për votën e çdo demokrati në Senatin e ndarë në mënyrë të barabartë.