Një amerikan i ndaluar në Bjellorusi para zgjedhjeve presidenciale të debatuara të gushtit, ka mbërritur në Shtetet e Bashkuara të mërkurën pasi Sekretari i Shtetit Mike Pompeo bëri thirrje për lirimin e tij, i tha Zërit të Amerikës avokati i zotit Shkliarov.
Vitali Shkliarov, një analist politik bjelloruso-amerikan i cili ka punuar në të kaluarën në fushatat politike të ish-Presidentit Barack Obama dhe Senatorit Bernie Sanders, u ndalua nga agjentët e sigurimit të shtetit ndërsa po vizitonte prindërit e tij në Grodno me 28 korrik.
Autoritetet e akuzuan për rol në organizimin e tubimeve të paligjshme për një pjesëtar të opozitës para zgjedhjeve të 9 gushtit, votime të cilat Lukashenko pretendon se i fitoi fuqishëm, por që nga ana tjetër janë parë si të manipuluara prej tij për të mbajtur pushtetin 26 vjeçar.
Dhjetëra mijëra bjellorusë i janë bashkuar që atëherë një kryengritjeje popullore, ndërsa janë përballur me shtypjen policore në përpjekjet e tyre për t’i dhënë fund në rrugë paqësore sundimit të Lukashenkos.
Por Lukashenko argumenton se protestat mbështeten nga fuqitë perëndimore, ndërsa ka sjellë arrestimin si provë e drejtpërdrejtë e ndërhyrjes amerikane.
Megjithatë, rrethanat e lirimit të zotit Shkliarov u varën nga një telefonatë që bëri Sekretari Pompeo me Lukashenkon të shtunën e kaluar, kontakti i parë i nevelit të lartë që dihet publikisht mes Shteteve të Bashkuara dhe Lukashenkos që nga fillimi i krizës politike.
“Sekretari bëri thirrje për lirimin e tij dhe largimin e menjëhershëm nga Bjellorusia të shtetasit amerikan Vitali Shkliarov të ndaluar padrejtësisht, dhe riafirmoi mbështetjen amerikane për aspiratat demokratike të popullit bjellorus,” u shpreh në atë kohë një zëdhënës i Departamentit të Shtetit.
Avokati i zotit Shkliarov, Anton Gashinsky tha për Zërin e Amerikës se klienti i tij paraqiti një kërkesë për të dalë nga vendi në pritje të gjykimit.
“Fakti që ata e miratuan kërkesën e tij është pa diskutim rezultat i telefonatës së zotit Pompeo”, tha avokati Gashinsky në një intervistë nga Minsku.“Ata e panë se mbajtja e tij në burg ishte toksike për vendin dhe për autoritetet. Ata morën vendimin e duhur,”tha ai.
“Shtetet e Bashkuara e mirëpresin largimin nga Bjellorusia të shtetasit amerikan Vitali Shkliarov të ndaluar padrejtësisht,”tha Sekretari Pompeo përmes një deklerate të publikuar të mërkurën.“Siç e kemi bërë të qartë Presidenti dhe unë, ne nuk do të tolerojmë që qeveritë e huaja të ndalojnë padrejtësisht shtetasit amerikanë.”
Avokati Gashinsky konfiromoi për Zërin e Amerikës se zoti Vitali Shkliarov tani ndodhet në Uashington dhe i është nënshtruar trajtimit mjekësor lidhur me simpotmat e shkaktuara nga koronavirusi dhe përfundimisht do të kthehet në Bjellorusi për t’u paraqitur në gjykatë sapo të jetë më mirë me shëndet.