Presidenti Jair Bolsonaro bëri të ditur të martën se është prekur nga sëmundja e COVID-19, një zhvillim që pritet ta nxisë edhe shumë debatin mbi trajtimin shpërfillës nga ana e tij të pandemisë, që u ka marrë jetën më shumë se 65 mijë brazilianë.
Z. Bolsonaro, 65 vjeç, bëri një test të hënën në mbrëmje pasi po përjetonte simptoma të COVID-19, mes tyre temperaturë.
Edhe pse disa nga ndihmësit e z. Bolsonaro kishin rezultuar pozitivë gjatë muajve të fundit, presidenti shpesh i ka shmangur masat paraprake siç është vendosja e maskës apo praktikimi i distancës fizike.
Të shtunën e kaluar, ai mori pjesë në një drekë të organizuar nga ambasadori amerikan në Brazil me rastin e 4 korrikut.
Ndërsa brazilianët prisnin rezultatet e testit të fundit të presidentit, mesazhet e postuara në mediat sociale ilustronin se sa i polarizuar është vendi.
Numri i të prekurve nga koronavirusi në Brazil llogaritet mbi 1.6 milionë vetë që nga fillimi i pandemisë, duke e renditur vendin e dytë në botë për nga niveli i përhapjes pas SHBA.