Ambasadori i ShBA në Gjermani përfaqësues i presidentit Trump për bisedimet Kosovë Serbi

Presidenti Trump njoftoi të enjten se do të emërojë ambasadorin amerikan në Gjermani, Richard Grenell si të dërguarin e tij të posaçëm për bisedimet e paqes midis Kosovës dhe Serbisë.

Ambasadori amerikan në Gjermani, i dërguari për bisedimet Kosovë-Serbi

Richard A. Grenell është ambasador i Shteteve të Bashkuara në Gjermani që nga muaji maj i vitit të kaluar. Zoti Grenell, ekspert i politikës së jashtme, është themelues i firmës "Capitol Media Partners" në vitin 2010, që ofron konsulencë për çështje të jashtme.

Ambasadori Grenell, ka qënë zëdhënës i ambasadës së Shteteve të Bashkuara në OKB për shtatë vjet, 2001-2008, duke e mbajtur këtë post më gjatë se çdo ambasador tjetër, duke shërbyer për katër ambasadorë të ndryshëm.

Ai mban gradën Master për Administratën Publike nga universiteti i Harvardit.

Kosova mirëpret emërimin e zotit Grenell

Presidenti i Kosovës, Hashim Thaçi, mirëpriti emërimin e zotit Grenell, duke theksuar se ky emërim "është një tjetër dëshmi që presidenti Trump, administrata amerikane, tërë shteti amerikan, qëndrojnë pranë nesh në çdo hap të rëndësishëm. Tash jemi edhe më konfident në procesin e dialogut dhe në mundësinë që të arrijmë njohjen nga Serbia dhe anëtarësimin në Kombet e Bashkuara, dhe kështu ta përmbyllim konsolidimin ndërkombëtar të shtetit tonë. Ky është lajm i mirë edhe për rajonin si dhe të gjithë ata që angazhohen për paqe të qëndrueshme, për zhvillim, për jetë më të mirë për të gjitha shtetet në Evropën Juglindore. E kemi thënë gjithmonë dhe besojmë gjithmonë se jemi me fat që kemi përkrah Shtetet e Bashkuara të Amerikës", shkroi ai në rrjetet sociale.

Kryeministri në largim i Kosovës, Ramush Haradinaj mirëpriti emërimin ndërsa shkroi se pret që të punojnë së bashku "në bisedimet e pakushtëzuara për arritjen e njohjes së ndërsjellë (më Serbinë) në kufijtë ekzistues".

Emërimi i zotit Grenell pasoi emërimin më 31 gusht të zotit Matthew Palmer si përfaqësuesi i Posaçëm i Departamentit amerikan të Shtetit për Ballkanin Perëndimor. Zoti Palmer që vazhdon të mbajë edhe postin e Zëvendës Ndihmës Sekretarit për Çështjet Evropiane, ishte përfshirë në përpjekjet për të nxitur ripërtëritjen e bisedimeve ndërmjet Kosovës e Serbisë, të ndërmjetësuara nga Bashkimi Evropian.

Emërimi i tij ishte cilësuar si një dëshmi e përfshirjes më të madhe të Shteteve të Bashkuara në procesin e bisedimeve ndërmjet Kosovës dhe Serbisë, ndërsa emërimi i zotit Grenell shënon një zhvillim të ri në këtë përfshirje.

Drejtori i Qendrës për Studime të Evropës Juglindore ne Universitetin e Gracit në Austri, Florian Bieber, në një postim në rrjetet sociale ngriti mëdyshjet për rolin e zotit Palmer pas emërimit të zotit Grenell.

"Nëse Trumpi emëron Richard Grenellin të dërguar të Posaçëm për Serbinë dhe Kosovën, cili është roli i Matthew Palmerit? Po ashtu mesazh shqetësues për pozicionin e përbashkët ndërmjet BE-së dhe Shteteve të Bashkuara; Grenelli ka një histori të armiqësimit me Gjermaninë dhe BE-në si ambasador (thirrje për mbështetje të së djathtës dhe të djathtës së skajshme). Nuk është shenjë e mirë", shkroi ai.

Në Prishtinë ambasadori amerikan Philip Kosnett tha se emërimi i zotit Grenell përkrah emërimit të zotit Palmer "dëshmon përkushtimin e qeverisë amerikane ndaj përparimit të shpejtë drejt ardhmërisë paqësore të rajonit".

Bisedimet ndërmjet Kosovës dhe Serbisë janë pezulluar që nga nëntori i vitit të kaluar, kur Kosova u vuri tarifa prej 100 për qind mallrave serbe në shenjë kundërshtimi ndaj qasjes së Serbisë ndaj shtetësisë së saj. Beogradi kushtëzon rifillimin e bisedimeve me heqjen e tarifave.

Shtetet e Bashkuara kanë kërkuar në vazhdimësi pezullimin e tarifave, ndërsa Bashkimi Evropian heqjen e tyre për të rihapur bisedimet me Serbinë, por qeveria në largim e Kosovës i ka rezistuar kësaj trysnie duke nxitur shqetësime për cenimin e marrëdhënieve me aleatët e saj.

Gazeta amerikane "Washington Post" kishte shkruar në muajin janar se presidenti i Kosovës Hashim Thaçi, më 21 dhjetor (2018) kishte zhvilluar një takim të pa raportuar diplomatik në Berlin me ambasadorin amerikan, Richard Grenell, në të cilin ishte zotuar për heqjen e tarifave prej 100 për qind ndaj mallrave serbe.

Lexoni edhe këtë Thaçi: Kosova gati të heqë tarifat ndaj mallrave serbe

Zoti Palmer i tha Zëri të Amerikës në një intervistë muajin e kaluar se duhet pritur zgjedhjet e 6 tetorit në Kosovë dhe se pritshmërinë amerikane janë që "qeveria e ardhshme e Kosovës do të jetë një qeveri pro dialogut, e gatshme të pezullojë tarifat të cilat janë pengesë për rifillimin e procesit të dialogut, e gatshme të formojë një ekip negociator të fuqizuar si dhe e gatshme të angazhohet me Serbinë në tryezën e bisedimeve me seriozitetin e qëllimit për të arritur një marrëveshje për normalizimin e marrëdhënieve. Shtetet e Bashkuara do të jenë me ta së bashku në çdo hap të këtij procesi, por Kosova duhet të marrë kontrollin e fateve të veta".

Lexoni edhe këtë Palmer shpjegon përparësitë në detyrën e re: SHBA mbetet e angazhuar në Ballkan

Vazhdimi i bisedimeve mund të pritet pas zgjedhjeve në Kosovë dhe diplomatët shpresojnë që kjo të ndodhë para se Serbia të hyjë në periudhën e zgjedhjeve që mbahen në pranverën e vitit të ardhshëm.