Një delegacion diplomatik turk do të vizitojë Uashingtonin të enjten për të zbutur tensionet. Njoftimi për vizitën bëri që të frenohej rënia e shpejtë e vlerës së monedhës turke. Analistët paralajmërojnë se rritja e tensioneve të SHBA-Turqi kërcënon të shkaktojnë një krizë financiare në Turqi.
Të hënën, lira turke pësoi rënien më të madhe në një dekadë. Kjo erdhi pas njoftimeve se administrata e Presidentit Trump po shikon mundësinë që t’i japë përjashtimin nga taksat të Turqisë në tregun e SHBA.
Lira e rimori paksa veten pas lajmeve të vizitës diplomatike. Por monedha filloi të bjerë përsëri të martën pas njoftimeve që mohonin lajmet e mëparshme se midis Ankarasë dhe Uashingtonit ishte arritur një marrëveshje paraprake.
Zëvendës ministri i jashtëm turk, Sedat Onal thuhet se do të drejtojë delegacionin, sipas një burimi të ministrisë së jashtme. Njoftimet e mëparshme thoshin se një delegacion shumë më i fuqishëm do të dërgohej në Uashington, duke përfshirë ministra të jashtëm, të brendshëm, të mbrojtjes dhe të financave.
Në krye të rendit të ditës pritet të jenë diskutimet për ndalimin e pastorit amerikan, Andrew Brunson. Brunson është aktualisht nën arrest shtëpie, ndërsa po gjykohet nën akuzat për terrorizëm. Shtëpia e Bardhë i hedh poshtë akuzat si të pabaza, duke e akuzuar Ankaranë për pengmarrje.
Tensionet mes SHBA-së dhe Turqisë u përshkallëzuan javën e kaluar, kur Presidenti i SHBA Donald Trump vuri në shënjestër dy ministra turq me sanksione për arrestimin e pastorit Brunson. Ankaraja u përgjigj me masa reciproke.