Në Tiranë u mbajt sot në mjediset e parlamentit, forum i shoqërisë civile mbi të drejtat qytetare dhe politike të komunitetit LGBTI në Shqipëri. Folësit u përqëndruan tek pjesëmarrja politike e personave LGBTI.
Ambasadori amerikan Donald Lu tha se gjendja është përmirësuar, por ka ende shumë diskriminim në shoqëri për ta.
Your browser doesn’t support HTML5
Tiranë, Forumi i të Drejtave Civile
Ai shprehu vendosmërinë për të mbështetur të drejtat e njeriut në cdo segment, dhe kujtoi se si vite më parë veprimtaritë e komunitetit LGBTI paragjykoheshin dhe goditeshin me vezë apo domate.
“Vërtet kam parë përparim gjatë 3 viteve të mia në Tiranë, por kam parë edhe diskriminimin dhe homofobi të vazhdueshme. Kam parë fare pak politikanë të gatshëm që të marrin pjesë në aktivitete e të mbështetin nisma. Unë besoj se populli shqiptar është bujar dhe tolerant. Shpresoj se edhe politikanët do të jenë tolerantë. Diskriminimit të komunitetit LGBTI i duhet dhënë fund” – tha ambasadori Lu.
Ndërsa ambasadorja e BE, Romana Vlahutin tha se Brukseli është përkrah cdo grupi vulnerabël. “Ata nuk duan të kenë më shumë ose më pak të drejta; thjesht duan të kenë të njëjtat të drejta njerëzore, si kushdo tjetër që përfaqësohet nga i njëjti parlament - tha ajo. - Duhet pranuar se vitet e fundit kushtet e komunitetit lgbt janë përmirësuar, kryesisht prej guximit të veprimtarëve të tyre, si edhe prej përmirësimit të ligjeve. Javët e fundit komuniteti lgbt pësoi diskriminim, përjashtim dhe fjalime urrejtje.
Sipas saj, antarësimi në BE është një zgjedhje me vlerë, respekti ndaj të drejtave themelore, toleranca, pranimi i diversitetit janë themelore dhe përcaktojnë se kush jemi ne si Bashkim.
Shqipëria ka miratuar një plan veprimi për komunitetin LGBT dhe zbatimi i tij kërkon një angazhim të fortë nga qeveria, dhe përpjekje me mendje të hapura nga parlamenti.
Oratorët pohuan se përparimi i vendit drejt Europës varet nga përmbushja e të drejtave njerëzore dhe pranimi i diversitetit.
Shqipëria është një vend demokratik dhe nevojitet të jetë tolerant, edhe sa u takon politikanëve, zyrtarëve dhe njerëzve në media dhe në familje çdo ditë të vitit.