Kur filluan ndryshimet demokratike në Shqipëri, 25 vjet më parë, Departamenti amerikan i Shtetit nuk kishte shumë burime të besueshme informacioni për ato që po ndodhnin në vend. Por duke pasur parasysh ndryshimet në Evropën Lindore, Shtetet e Bashkuara ndërmorrën hapa drejt rilidhjes së marrëdhënieve, me hamendje dhe duke shpresuar se vala e transformimeve do të përfshinte edhe Shqipërinë. Kolegia Keida Kostreci bisedoi me ish-drejtorin e Zyrës për Çështjet e Evropës Lindore dhe Jugosllavisë, James Hooper i cili në atë kohë mbulonte Ballkanin dhe ishte një nga zyrtarët kryesorë që punuan për rivendosjen e marrëdhënieve diplomatike. Zoti Hooper është aktualisht Drejtor Menaxhues i Grupit për të Drejtën Ndërkombëtare Publike dhe Politikat në Uashington.
