Udhëheqësi i krahut të djathtë të opozitës në Serbi, Tomislav Nikoliç filloi të pijë ujë sot por ende refuzon të marrë ushqim në ditën e gjashtë të grevës së urisë për të detyruar qeverinë pro-perendimore të vendit të zhvillojë zgjedhje të parakohshme.
Nikoliç mori vendimin për të pirë ujë pas thirrjes nga kreu i Kishës Ortodokse serbe, partriarku Irinej.
Partia progresiste serbe e Nikoliçit tha se zgjedhjet e parakohshme para fundit të vitit janë të nevojshme për shkak të situatës së përkeqësuar ekonomike dhe korrupsionit të gjerë në vend.
Qeveria e Serbisë drejtohet nga presidenti Boris Tadiç, i cili kërkon që vendi i tij të bëhet anëtar i Bashkimit Evropian.
Ai ka planifikuar zgjedhjet për në maj të vitit 2012, pas një vendimi të pritshëm në fund të këtij viti për kandidaturën e Serbisë në BE.
