Guvernatori i Wisconsinit, Scott Walker, ju bashkua kandidatëve të tjerë republikanë për garën presidenciale të 2016-ës, duke thënë se “ai ka hyrë në garë për të fituar për të mirën e popullit amerikan.”
47-vjeçari Walker është kandidati i 15-të për garën e republikanëve. Anketat e publikut tregojnë se ai është ndër kandidatët me shumë shanse për të marrë emërimin e partisë së tij.
Walker i takon krahut konservator të Partisë Republikane. Ai nuk ka kandiduar më parë për postin e Presidentit, por u bë i njohur për republikanët pasi ka fituar në tre zgjedhje që nga viti 2010, në një shtet që më parë ka votuar për kandidatët demokratë për president në shtatë zgjedhje me radhë.
Në vitin 2012, Walker u bë guvernatori i parë amerikan, që i mbijetoi zgjedhjeve të përsëritura, për shkak të përpjekjeve të tij për të dobësuar sindikatat në sektorin publik të shtetit të tij.
