I dërguari i Bashkimit Evropian për ndërmjetësimin e bisedimeve ndërmjet Kosovës dhe Serbisë, Robert Kuper, nuk ka arritur të sigurojë vazhdimin e këtyre bisedimeve që u ndërprenë për shkak të situatës në veriun e Kosovës, ku po vazhdon kundërshtimi i vendosjes së doganierëve të Kosovës në vendkalimet kufitare me Serbinë. Beogradi kërkon që pjesë e bisedimeve të jetë situata në këto vendkalime, ndërsa Prishtina refuzon të bisedojë me Beogradin për çështje që kanë të bëjnë me rregullimin e brendshëm të Kosovës.