Policia e Kosovës thotë se vazhdon përpjekjet për arrestimin e udhëheqësit të lëvizjes Vetëvendosje Albin Kurti, ndërsa akuzoi pjesëtarët e kësaj lëvizjeje për pengimin e punës së saj. Lëvizja Vetëvendosje por edhe disa organizata të tjera e kanë akuzuar policinë për veprime të dhunshme. Shtatë persona u arrestuan mbrëmë në Prishtinë dhe të paktën dhjetë të tjerë pësuan plagë të lehta gjatë përpjekjeve të policisë për të arrestuar zotin Kurti. Ndaj udhëheqësit të Vetëvendosjes është lëshuar një fletarrest për shkak të refuzimit të tij për t'u paraqitur në procesin gjyqësor që ka të bëjë me ngjarjet e 10 shkurtit të vitit 2007.