Në Kosovë, ekspertët e sigurisë thonë se Misioni i Bashkimit Evropian për sundimin e ligjit, duhet të mbështesë institucionet vendase për ta shndërruar Kosovën nga konsumuese, në prodhuese të sigurisë. Komentet pasojnë debatet e ditëve të fundit ndërmjet institucioneve të Kosovës dhe EULEX-it, lidhur me çështjen e veriut të vendit të banuar nga shumicë serbe, ku nuk veprojnë institucionet e Kosovës. Ekspertët thonë se debatet nuk rrezikojnë marrëdhëniet ndërmjet Kosovës dhe EULEX-it, por shtrojnë nevojën e një bashkërendimi më të mirë të veprimeve të tyre.
