Në Gjykatën e Qarkut në Prishtinë sot është zhvilluar seanca e dytë e konfirmimit të akuzës së ngritur në vjeshtën e vitit të kaluar kundër shtatë personave për trafikim të organeve njerëzore, krim të organizuar, ushtrim të paligjshëm të veprimtarive mjekësore dhe keqpërdorim të detyrës zyrtare.
Në mesin e të akuzuarve ka mjekë dhe një person, që më parë ka punuar në nivel të lartë në Ministrinë e Shëndetësisë. Akuza përfshin edhe dy persona të tjerë njëri shtetas izraelit dhe një shtetas turk, të cilët po kërkohen nëpërmjet policisë ndërkombëtare.
Sipas akuzës, grupi i shtetasve të Kosovës, ka qenë i përfshirë në rekrutimin e 20 shtetasve të huaj nga Moldavia, Kazakistani, Rusia dhe Turqia, të cilëve pretendohet se u ishin premtuar nga 20 mijë dollarë për dhurimin e veshkave, ndërsa marrësve të organeve u ishte kërkuar që të paguanin nga 80 mijë deri në 100 mijë dollarë.
Prokurori i çështjes, Jonathan Ratel, nga Misioni i Bashkimit Evropian për policinë e drejtësinë tha se dhuruesit ishin sjellë në Kosovë nën premtimet e rrejshme.
Akuza për trafikimin e organeve, ka të bëjë me zhvillimet në klinikë private “Medikus”, në Prishtinë në vitin 2008. Një transplantim i paligjshëm i një veshke që ishte kryer në një klinikë private në Prishtinë atë vit kishte çuar në arrestimin e tre udhëheqësve të asaj klinike si dhe në pezullimin nga puna të një zyrtari të Ministrisë së Shëndetësisë.
Hetimet e policisë atëbotë kishin zbuluar se një shtetas turk kishte dhuruar një veshkë, e cila ishte pranuar nga një shtetas izraelit. Më pas të arrestuarit ishin liruar, ndërsa hetimet kishin vazhduar nga EULEX-i.
Pas seancës së sotme dëgjimore, gjykata ka 15 ditë afat për të vendosur nëse do të ketë një proces gjyqësor apo jo. Të gjithë të akuzuarit kanë hedhur poshtë pretendimet e ngritura nga prokurori i çështjes, ndërsa mbrojtja kërkoi që akuza të hidhet poshtë. Mbrojtësi i të akuzuarit kryesor, Lutfi Dervishi, tha the po bëhen përpjekje që kjo çështje të ndërlidhet me raportin e të dërguarit të Këshillit të Evropës Dick Marty, i cili muajin e kaluar nxiti zemërim në Kosovë me pretendimet se udhëheqës të lartë të Ish Ushtrisë Çlirimtare janë të përfshirë në trafikimin e organeve njerëzore. Ai tha se këto dy çështje nuk kanë të bëjnë me njëra tjetrën.
Ligjet në Kosovë ndalojnë çdo veprimtari të transplantimit të organeve nëpër klinikat private.