Një organizatë jofitimprurëse në Shtetet e Bashkuara po klonon pemët më të lashta dhe më të larta në botë, në përpjekje për të luftuar ndryshimet klimaterike. Organizata po u kushton vemendje sidomos disa pemëve gjigande të Kalifornisë, siç janë sekuojat.
Këtu në malet Sierra Nevada të Kalifornisë, këta alpinistë po përpiqen t’u ngjiten njërës prej pemëve më të larta dhe më të lashta të botës. Por ata kanë qëllime më të mëdha se sa thjeshtë të arrijnë majën e pemës. Ata kanë ardhur këtu për të mbledhur degë dhe për t’i përdorur në klonimin e sekuojës gjigande.
Ekspedita u organizua nga shoqata “Archangel Ancient Tree Archive.” Ata besojnë se ripopullimi i pyjeve do të ndihmojë në luftën kundër ndryshimeve klimaterike.
“Pra, po përpiqemi të bëjmë diçka në minutën e fundit dhe të mbledhim gjenet e sekuojave më të larta dhe t’i arkivojmë për t’i përdorur më vonë. Duhet bërë urgjentisht”.
Sekuojat e larta mund të rriten deri në 92 metra lartësi dhe 8 metra gjerësi, dhe janë të përsosura për rezervimin e karbonit. Ato mund të jetojnë tre mijë vjet, duke i mbijetuar zjarreve, thatësirave dhe sëmundjeve.
Sekuojat që rriten në malet Sierra Nevada janë ndër më të mëdhatë dhe të lashtat në Tokë, rreth tremijë vjeçare.
“Besojmë se mbase ka diçka të veçantë në gjenetikën e tyre dhe mund të na ndihmojë me përpjekjet për t’i rezistuar ndryshimeve klimaterike.”
Alpinisti Jim Clark ka qenë i zënë me punën e mbledhjes së degëve.
“Këto copra të prera i kemi marrë nga maja e pemës së sekuojës, 70 metra e lartë. Shkuam deri në majë për t’i marrë.”
Clark pastaj i merr ato në laboratorin e shoqatës në Miçigan ku i presin dhe i mbjellin në konteinerë me lëndë ushqyese.
“Gjenetika është e njëllojtë, nuk ndryshon. Kjo pemë e vogël do të jetë saktësisht e njëjtë gjenetikisht si pema mëmë”.
Archangel thotë se ata kanë klonuar njëqind e shtatëdhjetë specie dhe kanë mbjellë 300,000 klone në të gjithë botën.
Një ekip alpinistësh, ekspertë për pemët nga i gjithë vendi, dolën vullnetarë për ekspeditën në muajin maj për të plotësuar mostrat gjenetike të shoqatës Archangel.
Por skeptikët pyesin nëse pemët e lashta janë gjenetikisht më të mira apo janë thjesht me fat që nuk janë prerë.
Ata gjithashtu kanë dyshime se mbjellja e një numri të kufizuar pemësh do të ndihmojë për të frenuar ndryshimet klimaterike.
“Ritmi me të cilin klima po ndryshon tani është më i shpejtë se në çdo kohë në historinë e Tokës”.
Dawson është për masa më të thella, si pakësimi i përdorimit të lëndëve djegëse fosile dhe mbrojtja e pyjeve të mëdha.