Në Shqipëri, ambasadori i OSBE-së Eugen Wollfarth u shpreh sot i shqetësuar për zvarritjet e procesit të Gërdecit, të cilat sipas tij cënojnë imazhin e sistemit të Drejtësisë.
Në një deklaratë të shpërndarë sot, ambasadori Wollfarth shprehet se “procesi duket se nuk po zhvillohet në përputhje të plotë me parimet e gjykimit të drejtë, të mishëruara në Kushtetutë dhe në ligjet e vendit. Mosparaqitja e përsëritur e avokatëve mbrojtës nëpër seanca përbën një abuzim të çdo sistemi drejtësie”, thekson ambasadori i OSBE-së.
Ai shton se tre vjet pas tragjedisë së Gërdecit dhe megjithë përpjekjet e konsiderueshme që ka bërë trupi gjykues për të planifikuar seanca çdo dy ditë, procesi duket se është shumë larg finalizimit dhe shumica e seancave nuk janë zhvilluar”, shprehet ambasadori Wollfarth.
“Vonesat e vazhdueshme – shton ai – nuk bëjnë gjë tjetër veçse e cënojnë besimin aq shumë të nevojshëm te sistemi i drejtësisë dhe më gjerësisht të shteti i së drejtës në Shqipëri, veçanërisht në këtë çështje kaq delikate”, nënvizon ambasadori duke i bërë thirrje “autoriteteve të Drejtësisë që të ndërmarrin të gjitha përpjekjet e mundshme, brenda kuadrit ligjor, për të garantuar përmbylljen e shqyrtimit të drejtë dhe publik të kësaj çështjeje brenda një periudhe të arsyeshme kohore”.
Deri më tani janë zhvilluar 152 seanca dhe zvarritjet e procesit të Gërdecit bënë që katër muaj më parë të liroheshin nga burgu edhe tre të pandehurit kryesor të çështjes. Ministri i atëhershëm i Drejtësisë Bujar Nishani por edhe Këshilli i Lartë i Drejtësisë u angazhuan për të kryer inspektime si dhe për të ndërhyrë në ligjin për avokatinë për të shmangur vonesat në proceset gjyqësore.
