Prurjet e shtetasve afganë si refugjatë në Shqipëri nuk kanë munguar vitet e fundit, dëshmojnë të dhënat e autoriteteve kufitare shqiptare. Hyrja e tyre në Shqipëri është kryer nga kufiri grek dhe refugjatët afganë kanë synuar ta përdorin Shqipërinë si një pikë tranziti për të kaluar drejt vendeve të tjera europiane.
Të dhënat e Institutit shqiptar të Statistikave dëshmojnë se numri ka ardhur në rritje kohët e fundit. Kjo, pasi Greqia nënshkroi një marrëveshje ripranimi me Afganistanin dy vite më parë dhe jo pak prej familjeve afgane që jetonin në Greqi (rreth 40.000 është numri i përgjthshëm sipas autoriteteve greke) iu drejtuan kufirit shqiptar për të kaluar drejt vendeve të tjera europiane nga frika e rikthimit në Afganistan.
Sipas Institutit shqiptar të Statistikave në vitin 2019 në territorin shqiptar hynë nga Greqia 541 afganë duke u renditur të katërtit, sipas vendit të origjinës në numrin e personave që hynë në mënyrë të parregullt në Shqipëri.
Edhe në vitet e mëparshme shifrat për shtetasit afganë varionin nga 200-400 persona në vit ndërkohë që numri i azilkërkuesve nga Afganistani ishte shumë më i vogël ( nga 20 deri në 60 vetë cdo vit).
Gjatë vitit 2020 pandemia e koronavirusit uli prurjet e refugjatëve afganë nga Greqia në Shqipëri për shkak të bllokimit të kufijve. Në muajin prill të vitit të shkuar autoritetet kufitare shqiptare trajtuan në një qendër të përkohshme në Gjiroakster për mbi 1 muaj një grup refugjatësh afganë me gra dhe fëmijë që u bllokuan në Shqipëri si pasojë e masave të pandemisë duke afruar për ta krahas akomodimit dhe ushqimit edhe trajtimin shëndetësor dhe vaksinimin e fëmijëve.
Sipas autoriteteve shqiptare të kufirit, afganët njihen për profilin e emigrimit në familje të mëdha nga 5 deri në 13 anëtarë (shumë rrallë shfaqen raste migrimi si individë). Gjatë qëndrimit të tyre në territorin shqiptar gjatë viteve të fundit nuk janë raportuar incidente.
Për autoritetet shqiptare të kufirit, sipas raporteve të organizatave që mbrojnë të drejtat e refugjatëve, ka qenë i vështirë sigurimi i përkthyesve në gjuhën pashtu dhe për një pjesë të tyre proceset e intervistimit janë zhvilluar duke komunikuar në gjuhën greke pasi afganët duke qëndruar prej vitesh në Greqi arrinin të komunikonin në greqisht.